Keshte aldymen el basyna syn týǵan sátte qarý men qalamdy qatar ustaǵan qarymdy qalamgerdiń ómiri men ónerin qamtyǵan derekti fılm kórsetildi. Odan keıin jýrnalıst Maǵjan Sadyhan jazýshy shyǵarmashylyǵy týraly baıandama jasady. Is-sharany belgili aqyn, jyrshy, Qazaqstannyń eńbek sińirgen qaıratkeri Baıanǵalı Álimjanov ásem sózben árlep, tartymdy júrgizdi.
– Ásken aǵanyń esimin alǵash 70-jyldary ǵalym Tursynbek Kákishevtiń aýzynan estidim. Ol kisi «Selınogradta sondaı maıdanger qalamger turady», dep, maqtanyshpen aıtty. Sol tusta Selınograd – Tyń ólkesiniń ortalyǵy edi. Osy óńirde halqymyzdyń úles sany tym azaıyp ketkeni janymyzǵa batatyn. Endi bul jaqta tilimizdiń jaǵdaıy ne bolady, túgeldeı orystanyp ketpeı me degen ýaıym boldy. Sonda munda kim bar degende, aldymen oıymyzǵa Ásken Nábıev, Nurǵoja Orazov, Oktıabr Álibekov, Ánýar Ipmaǵambetov, Aldan Smaıylov sekildi qalamgerler túsetin. Osy azamattardyń bári oblystyq gazette qyzmet istedi. Qazaq redaksııasy ulttyq qundylyqtarymyzdy saqtap turǵan qasıetti orda sekildi kórindi. Bul qalamgerlerdi kórinbeıtin kúreskerler dep aıtýǵa bolady. Ásekeń óz ana tili úshin kúresip, qazaq tilinde kórkem shyǵarma jazdy. Qazaq mektepteriniń toptap jabylýyna qarsylyq kórsetti. Qazirgi qalanyń ortasyndaǵy Kenesarynyń sarbazdary jerlengen kóne qorymdy tegistep, ústinen kópqabatty úı turǵyzamyz degende, soǵan qarsy bolǵandardyń biri – Ásken aǵamyz. Qandy maıdannan aman kelip, jan jary Farıda apaı ekeýi 11 bala tárbıelep ósirdi. Balalarynyń bári el tanyǵan azamat boldy, – dedi B.Álimjanov.
Ásken Nábıev – Aqmola oblysynyń Aqkól aýdanynda týǵan. 1941 jyly orta mektepti bitire salysymen áskerge alynyp, Stalıngrad túbindegi qandy qyrǵynǵa qatysady. Osy shaıqasta aýyr jaralanyp, elge oralady. Áskerden kelgennen keıin aýyl mektebinde muǵalim, aýdandyq partııa komıtetinde nusqaýshy bolyp isteıdi. Jas kúninen án men jyrǵa qumartyp, ádebıetti súıip ósken qalamger 1947 jyly jýrnalıstıkaǵa aýysyp, qazirgi Aqmola oblysynyń «Arqa ajary» gazetinde menshikti tilshi, bólim meńgerýshisi qyzmetin atqarady. Baspasózde istep júrip, kórkem shyǵarmaǵa qalam terbedi. 1959 jyly «Perzent» atty tuńǵysh áńgimeler jınaǵy jaryq kórdi. Odan soń ile-shala «Gúlzı», «Sholpan», «Aýyr aptalar», «Beıtanys boıjetken», «Alaqaıǵy», «Qanat qaqqanda», «Bel-belester», «Qala ortasyndaǵy qamal», «Maıdan áńgimeleri», «Sherýli jyldar» taǵy basqa kitaptary oqyrmanǵa jol tartty. Esimi elge tanyldy. Sondaı-aq jazýshy uzaq jyl boıy Qazaqstan Jazýshylar odaǵynyń burynǵy Selınograd oblysaralyq bólimshesiniń ádebı keńesshisi qyzmetin atqaryp, ózinen keıin qalam ustaǵan jastarǵa qamqorshy boldy.
Prozashynyń shyǵarmalarynda ózi ómir súrgen dáýirdiń kelbeti, aýyl adamdarynyń aqjarma kóńili, sum soǵystyń qasireti shynaıy beınelengen. Akademık Rymǵalı Nurǵalı jazýshynyń bir kitabyna jazǵan alǵy sózinde: «Kóp sózge baryp, ár shóptiń basyn shalmaıdy, ózin madaqtap ketpeıdi. Bolǵan nárseni naqty jáne kórkem baıandaıdy», dep baǵa beripti. Á.Nábıev shyǵarmalarynyń ishindegi shoqtyǵy – «Alaqaıǵy» povesi. Bir jaǵynan, bul týyndynyń kólemine qarap, roman deýge bolady. Shyǵarmada otyzynshy jyldardaǵy ashtyq zulmaty nanymdy sýrettelgen. Ádebıetimizde ashtyq týraly jazylǵan dúnıeler jeterlik, biraq bul povestiń ereksheligi nede degende, qalamger kórkemdikti derektilikpen ushtastyryp, ózinshe bólek álem jasaǵan. Týyndyda avtor ózi kózimen kórgen oqıǵalardy kesteli tilmen aıshyqty bederlegen.
Mazmundy is-shara barysynda sóz sóılegender qabyrǵaly qalamgerdiń jazýshylyǵy ǵana emes, aqyndyǵy, sazgerligi, ánshiligine toqtaldy. Belgili ǵalym Serik Negımov maıdangerdiń jazýshylyǵynan bólek, aqyndyǵy men ázilge ustalyǵy, áýezdi ánge qushtarlyǵy, qarapaıymdylyǵy týraly áńgimeledi. Oblystyq gazette onymen birge qyzmet istegen Bádýan Imashev pen Jylqybaı Jaǵyparuly jyly estelikterimen bólisti. Qazaqstan Jazýshylar odaǵynyń Astana qalalyq fılıalynyń dırektory, aqyn Dáýletkereı Kápuly sýretkerdiń ómir jolynan syr shertip, osy is-sharany ótkizýge uıytqy bolǵandarǵa alǵysyn jetkizdi. Byltyr jazýshynyń 100 jyldyǵy bas shaharda keń kólemde atap ótildi. Astanada Ásken Nábıev atyna kóshe berildi.
Kesh sońynda jazýshynyń uly, qoǵam qaıratkeri, mesenat Marat Nábıev ákesi týraly taǵylymdy oı qozǵap, jınalǵan qaýymǵa rızashylyǵyn bildirdi.
