Aýylǵa sońǵy 5 jylda 2,4 mlrd teńge qarajat qaralypty. Osy aqshanyń 1,3 mlrd teńgesi memleketke qol jaımaı, týǵan topyraǵyn túletken mesenat, Qazaqstannyń Eńbek eri Imamzada Shaǵyrtaevtyń demeýshiligi esebinen bólingen. Turǵyndardy turaqty jumyspen qamtyp kele jatqan kásipker azamattardy ıgilikke jumyldyryp, aýylyn ajarlandyryp otyr.
Eldi mekendegi 120 oryndyq «Tań bóbegi» balabaqshasy, sport kesheni, aýylǵa kiretin jol boıyndaǵy jaryq shamdar, búginde ónim shyǵaryp jatqan et óńdeý sehy – osy «Tań LTD» kompanııasynyń tartýy. On úsh jyldan beri úzdik nátıje kórsetken dıqandar men mehanızatorlarǵa birneshe avtokólik, 300 mln teńge qarjylaı syıaqy bergen sharýashylyq ta osy. Aýyldyń 250-den astam adamyn jumyspen qamtyǵan seriktestik ákimdikpen birlesip turǵyndardyń baý-baqsha egýi úshin 60 gektar jer úlestirgen.
О́tken jyly Tań aýylyndaǵy birqatar áleýmettik nysandar men avtomobıl joldaryn jóndeýge joba-smetalyq qujattar ázirlenip, bıýdjet esebinen qarjylandyrýǵa usynylypty. Bıyl 4 jobaǵa oblystyq bıýdjetten 813,9 mln teńge bólingen. Mádenıet úıin kúrdeli jóndeýdiń joba-smetalyq qujattamasy men eskızdik jobasyn ázirleýge Almaty, Túrkistan qalalarynan tájirıbeli sáýletshi mamandar qatysyp otyr. Joba quny – 377,4 mln teńge. Jarııalaǵan memlekettik satyp alý konkýrsynyń jeńimpazy jýyrda anyqtalady.
Aýyl tirligin túlete túsý úshin «Tań-Jańaqonys» avtomobıl jolyn qaıta jańǵyrtýǵa – 287,6 mln, «Tań-Samurat» avtomobıl jolyn qaıta jańǵyrtýǵa – 118,8 mln, qosymsha sý kóterý uńǵymasyn qaıta qazýǵa 30 mln teńge bólingen. Bul jobalardyń memlekettik satyp alý rásimderi júrgizilý ústinde. Aýylǵa kireberistegi «Bozaryq» kanaly kópirin qaıta jańǵyrtýǵa jáne 4 kósheni jaryqtandyrýǵa joba-smetalyq qujattama ázirlenip, bıýdjettik ótinim joldanypty. Ishki kóshelerdi jóndeý jumystary aýdandyq bıýdjet esebinen iske asyrylatyn bolady. Qazirgi eldi mekenderde beıbereket salynǵan qurylystar joqtyń qasy deýge bolady. Aýyldan túsetin óndiristik ǵımarattar men «Tań LTD» JShS demeýshiligimen salynatyn jańa turǵyn úılerdiń oryndary belgilenip, eskızdik jobaǵa engizilip qoıdy.
О́ńirde «Aýyldyq aýmaqtardy damytýdyń 2023-2027 jyldarǵa arnalǵan tujyrymdamasy» aıasynda eldi mekenderdiń aldaǵy jospary, órkendeý múmkindikteri qarastyrylyp otyr. Byltyr aýyl ıgiligine memlekettik bıýdjetten 18 mlrd teńge jumsalǵan. «Aýyl – el besigi» aıasynda 47 eldi mekende 216 jobany júzege asyrýǵa 12 mlrd 400 mln teńge bólingen. Bıyl osy baǵdarlama sheńberinde 11 mlrd teńgeniń 67 jobasy mejelenip otyr.
«Aýyl amanaty» baǵdarlamasy boıynsha 3 mlrd teńgeniń 404 jobasy júzege asty. Osy jyly 6 mlrd teńgeniń 800-den astam jobasy iske asyrylmaq. Jýyrda ótken aýyldy damytý joldary pysyqtalǵan májiliste oblys ákimi Nurlybek Nálibaev ótken jyldan bastap «Úlgili eldi meken» jobasy aıasynda jeńimpaz 12 eldi mekenge zamanaýı úlgidegi 29 arnaıy tehnıka berilgenin atap ótti. Byltyr 12 aýyldyq eldi mekenge gaz kirgizilip, osy kúni óńirde «kógildir otyn» ıgiligin kórip otyrǵan aýyl sany 34-ke jetti. Bıyl 4 mlrd teńgege taǵy 12 eldi mekenge gaz tartylady.
Qyzylorda oblysy
