Jobanyń mindeti – «Aýyl sharýashylyǵy janýarlaryn birdeılendirý» AJ-da jáne Biryńǵaı avtomattandyrylǵan basqarý júıesi AJ-nyń Veterınarlyq qaýipsizdik modýlinde «Vet Monitoring» modýlin synap, iske qosý.
Joba aıasynda eki sıfrlyq úderis synaqtan ótkiziledi: «Memlekettik shekaradan – mejeli pýnktige deıin» jáne «Týǵannan bastap – ónimge deıin». Aqparattyq júıelerdiń jumysy «Jaılaý» fermerler bazarynyń aýmaǵynda tanystyryldy. Sórelerden et satyp alyp, QR kody arqyly onyń qaıdan shyqqany týraly aqparatty bile alasyz.
«Memlekettik shekara – mejeli pýnkt» úderisiniń áreket etý prınsıpi: Sharbaqty veterınarlyq baqylaý beketinde Almatyǵa baratyn et, sút nemese basqa da mal sharýashylyǵy ónimderi tekseristen ótedi. Memlekettik veterınarlyq ınspektor aqparattyq júıege tekseris boıynsha málimetterdi engizip, veterınarlyq sertıfıkattyń zańdylyǵyn rastaıtyn QR-kody bar tekserý aktilerin jasap, júktiń tekseristen ótkeni týraly aýmaqtyq ınspeksııalarǵa habarlama jiberedi.
«Veterınarlyq tekseris kezinde synama alynsa, zerthanaǵa tıisti habarlama jiberiledi. Synama alynǵan júgi bar kólik saraptama nátıjelerin kútpesten ári qaraı júre beredi, ol birneshe kúnnen keıin kelýi múmkin. Zerthanalyq zertteý nátıjesin QR-kodty skanerleý arqyly synama aktisinen, kórýge bolady. Synamalardan normadan aýytqýlar tabylsa, ári qaraı ótkizýge shekteý qoıylady», dep túsindirdi aýyl sharýashylyǵy vıse-mınıstri Amanǵalı Berdalın.
«Týǵannan – ónimge deıin» úderisi veterınarlyq-sanıtarlyq saraptamanyń barlyq fýnksıonalyn sıfrlandyrady: maldy soıýdan jáne saraptama júrgizýden bastap, naryqta satýǵa deıin. Ol sondaı-aq qajetti anyqtamalardy berýdi, saraptama júrgizýdi jáne ótkizý oryndarynda QR-kod jasaýdy qamtıdy.
«Vet Monitoring» modýlinde usynylǵan úderister ashyqtyqty qamtamasyz etedi, rásimder sanyn edáýir qysqartady, veterınarlyq tekserý men saraptama júrgizbeı, mal soıýdyń aldyn alady. Sondaı-aq mal basynyń tolyq ári naqty esebin júrgizip, olardy sıfrlyq baqylaýǵa múmkindik beredi. Qanatqaqty joba 2024 jylǵy 31 naýryzǵa deıin jalǵasady.
Búgingi tańda Biryńǵaı avtomattandyrylǵan basqarý júıesi AJ-da bordaqylaý alańdaryna, soıý pýnktterine, etti saqtaý, óńdeý jáne maldy, ónimder men shıkizatty ótkizý oryndaryna, sondaı-aq veterınarlyq preparattardy, jem-shóp pen jem-shóp qospalaryn óndirý, saqtaý jáne ótkizý jónindegi uıymdarǵa eseptik nómirler beretin memlekettik qyzmetter qoljetimdi.
Anyqtama: Búgingi tańda el aýmaǵynda 851 soıý nysany bar (68 et óńdeý kásiporny, 251 soıý pýnkti, 532 soıý alańy). Veterınarlyq talaptarǵa sáıkes kelmegendikten, 106 soıý nysany jumys istemeıdi (onyń ishinde 27-si – et óńdeý kásiporyny, 77-si – soıý pýnkti jáne ekeýi – soıý alańy), 661 soıý alańynyń eseptik nómirleri qaıtyp alyndy.
