Foto: Jetisý oblystyq PB saıtynan
Ishki ister mınıstri Erjan Sadenov qyzmetkerlerge Memleket basshysy Qasym-Jomart Toqaevtyń vedomstvo alqasynda ishki ister organdarynyń aldyna qoıǵan negizgi mindetterin jetkizdi. Mınıstrdiń orynbasarlary ótken jylǵy jumysty qorytyndylap, ózderi jetekshilik etetin baǵyttar boıynsha 2024 jylǵa arnalǵan josparlarymen bólisti. Otyrys barysynda mınıstr qylmystyń jekelegen túrleriniń ósýi baıqalatyn jáne olardy ashý deńgeıi tómendegen óńirlik polısııa departamentteriniń jumysyn synǵa aldy. Áriptesterine aldaǵy attestasııa týraly eskertip, bıyl mınıstrlik kadr sapasyn arttyrýǵa den qoıatynyn aıtty.
«Bizdiń negizgi mindetimiz – qoǵamdyq tártipti qamtamasyz etý. Zań jáne tártip, quqyq buzýshylyqtarǵa múldem tózbeýshilik, jazanyń bultartpastyǵy birinshi orynda turýy kerek. Sondyqtan narıadtardyń júıeli jumysyn uıymdastyryp, kósheler men aýlalardy barynsha qamtýdy, mektepter men joǵary oqý oryndarynda profılaktıkalyq jumysty kúsheıtýdi tapsyramyn», dep atap ótti mınıstr.
Sondaı-aq, ol aýmaqtyq polısııa departamentteriniń bastyqtaryna azamattardy jeke qabyldap otyrýdy, olardyń konstıtýsııalyq quqyqtary men tergeý merzimderiniń saqtalýyn qamtamasyz etýdi, kóshi-qon salasyna patrýldik, ýchaskelik ınspektorlar men jedel qyzmetkerlerdi jumyldyrýdy tapsyrdy.
«Jıynda IIO qyzmetteri men bólinisterine taǵaıyndalǵan jańa basshylar tanystyryldy. QR Prezıdenti Ákimshiliginiń kelisimi boıynsha ishki ister mınıstriniń buıryǵymen qyzmetti kúsheıtý úshin krımınaldyq polısııa departamentiniń bastyǵy laýazymyna polısııa polkovnıgi Qanat Nurmaǵambetov taǵaıyndaldy. Buǵan deıin ol mınıstrliktiń uıymdasqan qylmysqa qarsy kúres departamentiniń bastyǵy bolǵan», delingen habarlamada.
QAJK tóraǵasy laýazymyna ádilet polkovnıgi Teńizjan Jánibekov taǵaıyndaldy. Ol buryn Shymkent qalasy men Túrkistan oblysy boıynsha qylmystyq-atqarý júıesi departamentiniń bastyǵy qyzmetin atqarǵan. Buryn IIM esirtki qylmysyna qarsy is-qımyl departamenti bastyǵynyń orynbasary bolǵan polısııa polkovnıgi Sarqytbaı Qusaıynov Jetisý oblysy PD bastyǵy laýazymyna taǵaıyndaldy.
