Sýrette: Qarasaz aýylyndaǵy «Muztaý», mine, osyndaı!
«Bıylǵy jyly Qarasaz aýylynan bıiktigi 16 metrge jeterlik «Muztaý» paıda boldy. Buǵan osy óńirdegi aýyl turǵyndary túgel qýanyp, qys qyzyǵyna keneldi. Qarasaz aýylyna úsh artezıannan aýyz sý tartylǵan. Qysym joǵary bolyp, qysty kúni jarylyp ketpes úshin artyq sýdy syrtqa bólý arqyly osyndaı «muztaý» jasaýdyń oraıy keldi. Oǵan aýyldyń belsendi azamattary atsalysty», deıdi Qarasaz aýyldyq okrýginiń ákimi Dıdar Nurboluly.
Qarasaz aýylynda 3 myńǵa jýyq adam turady. Tuzkól aýyly da osy okrýgtiń aýmaǵynda ornalasqan. Kóptiń kózaıymyna aınalǵan «Muztaýǵa» Raıymbek aýdanynyń ǵana emes, endigi kezekte kegendikter de kele bastaǵan. Eki aýdannyń birlesken is-sharalaryn ótkizý josparlanǵan. Sonymen qatar mekemeler men eńbek ujymdary da bas qosyp, qys mezgiliniń qyzyqtaryn mándi ótkizýde judyryqtaı jumyla bastaǵan. Osyndaı ıgi istiń bastaýyna aınalǵan «muztaý» mańynan syrǵanaqqa qaryq bolǵan balalardyń kúmis kúlkisin estip, qýanyshty sátterin kórýge bolady.
Jýyrda osy óńirde kómir tasymaldaýshy azamattardyń uıytqy bolýymen Shalkóde, Tuzkól, Qoshqar, Qarasaz aýyldarynyń turǵyndary bas qosyp, birlesken is-shara ótkizgen. «Muztaý» mańyndaǵy qys qyzyqtary munymen bitpek emes.
«Sátti bastalǵan «Muztaý» alańynda shańǵyshylar, konkımen, shanamen syrǵanaýshylar jarystaryn uıymdastyrýdy josparlap otyrmyz. Keleshekte irgesi keńeıip, kelýshilerge jaǵdaı jasaýdy oılastyrýdamyz. Aýyl – bárimizdiń ortaq úıimiz bolǵandyqtan, bul iste azamattar aıanyp qalmaıdy», – deıdi aýyl ákimi Dıdar Nurboluly.
Almaty oblysy
