Kórme • 23 Qańtar, 2024

Kónermeıtin kórkemdik

146 ret

kórsetildi

3 mın

oqý úshin

Kenshiler qalasyndaǵy Beıneleý óneri murajaıynda Sýretshiler odaǵynyń 60 jyldyǵyna oraı «Qaraǵandynyń kórkemdik bastaýlary» atty kórme ashyldy. Murajaı qorynda alpysqa tarta jumys bar. Fotosýretter, kartınalar, músinder óńir mádenıetinen syr shertedi. Munyń bári qaraǵandylyq beıneleý óneri sheberleriniń týyndysy. Qaraǵandy qalasynyń 90 jyldyǵy men Sýretshiler odaǵynyń 60 jyldyǵy qatar kelgen mereıli jylda murajaı osyndaı mándi kórme uıymdastyryp otyr.

Qasymhan ǴALYM

«2024 jyl mereıtoılyq ataýly kúndermen este qalmaq. Atap aıtqanda, qalanyń 90 jyldyǵy jáne Qaraǵandy Sýretshiler odaǵynyń 60 jyldyǵy. Eki mereıli datanyń da mańyzy zor. «Qaraǵandynyń kórkemdik bastaýlary» kórmesi – «Sýretshiler odaǵy – 60» kórme sıkliniń alǵashqysy. Kórmeden Qaraǵandydaǵy beıneleý óneriniń bastaýynda turǵan – Vladımır Eıfert, Pavel Frızenniń jumystary oryn alǵan. Jalpy, kóptegen sýretshiler sol kezeńde qýǵyn-súrginge ushyrap, taǵdyrdyń jazýymen Qaraǵandyǵa keldi. Daryndy sýretshiler qalany bezendirýge úles qosty. Portretter saldy, alǵashqy óner úıirmelerin uıymdastyrdy. Qalanyń kórkemdik ómiri osy tulǵalardan tamyr tartady», – deıdi murajaı dırektory Bıbigúl Qudabaeva.

«Sýretshiler odaǵy – 60» sıkliniń kórmesi jyl on eki aı boıy jalǵasyn tappaq.

apr

Sıkldiń birinshi kórmesi – Qaraǵandynyń 50-60 jyldardaǵy beıneleý ónerine arnalsa, kelesi ekspozısııa – 70-jyldardy qamtıdy. Barlyǵy Qaraǵandynyń ótken tarıhy, óndiris, sondaı-aq qalanyń damýyna úles qosqan sol kezdegi qaıratkerlerdiń portretterinen turatyn 60 jumys murajaı tórinde tur.

Qaraǵandyda kórmeler 1964 jyly Sýretshiler odaǵy qurylǵanǵa deıin de ótti. Alǵashqy kórme 1945 jyly uıymdastyrylsa, al 1956 jyly Qaraǵandy kórkemóner-óndiristik sheberhanasy ashyldy.

Kórmeniń fotoblogy negizinen 1953 jyldan Qaraǵandyda turǵan músinshi-monýmentalıst Nıkolaı Rybeskııdiń eńbekterinen jasaqtalǵan. Músinshiniń qoltańbasy Kenshilerdiń mádenıet saraıynda, temirjol vokzalynyń ǵımaratynda qalǵanyn atap ótý lázim. Keskindeme – burynǵy sýretshilerdiń sýretteri. Olardyń kópshiligi Otan soǵysynyń qatysýshylary – Vıktor Krylov, Pavel Rechenskıı, Pavel Andrıýk, Petr Antonenko.

Kórmeniń maqtanyshy – óńirimizdiń tuńǵysh qazaq sýretshisi Raıymqul Esirkeev. Ol – Qaraǵandy Sýretshiler odaǵynyń negizin qalaýshylardyń biri. Anatolıı Bılyk pen Iýrıı Gýmmeldiń eńbekteri músin blogynda ornalasqan. Anatolıı Bılyktyń jumysy Ýkraına men Qazaqstannyń qalalaryna kórik berdi. Qaraǵandyda ol Iýrıı Gýmmelmen birlesip, Keńes Odaǵynyń Batyrlary Nurken Ábdirov pen Zoıa Kosmodemıanskaıaǵa eskertkishter ázirlegen.

Kórme qańtardyń sońyna deıin jalǵasady.

Qaraǵandy oblysy