«Aýla sypyrýshylardyń jumystary ońaı emes. Qysy-jazy aýyldy qoqystan tazartady. Bizge Astanadan 30 kúrteshe jetti. Kóp oılanbaı, eńbek adamdaryna tabystaýdy jón kórdik. Eńbekkerler eń úlken qurmetke laıyq», deıdi «Nura arnasy» eriktiler shtabynyń jáne aýdandyq Jastar resýrstyq ortalyǵynyń basshysy Talǵat Sholtaev.
«Nura arnasy» eriktiler shtabynyń ókilderi jaqsylyq jasap jarysady desek te bolady. Máselen, jańa jyl qarsańynda múmkindigi shekteýli balalarǵa táttiler taratqan. Qarttar úıine baryp, merekelik dastarqan jaıyp bergen. Jergilikti balalar men jasóspirimder sport mektebine sporttyq qural-jabdyqtar satyp alýǵa járdemdesken. Jıyrmadan astam jalǵyzbasty jáne qart adamnyń aýlasyn qardan tazartyp bergen. Boran kezinde qar qursaýynda qalyp qoıǵan kólikterge járdemdesken.
«Bizdiń shtab 120-dan astam eriktini qamtıdy. Qatarda mektep oqýshylary, stýdentter jáne ártúrli uıym qyzmetkerleri, sonyń ishinde muǵalimder de bar. Boran kezinde muǵalimder toqtap qalǵan kólikterdegi jolaýshylardy qar qursaýynan shyǵaryp alýǵa kómektesti. Biz olardy jylytý pýnktterine deıin jetkizdik. Aldaǵy ýaqytta demeýshilik kómektiń arqasynda biz árqaısysynyń salmaǵy 50 kılo bolatyn 30 azyq-túlik jıyntyǵyn taratýdy josparlap otyrmyz. Bizge negizinen elordalyq kásipkerler, iri sýpermarketter men uıymdar kómektesedi», deıdi Talǵat Sholtaev.
Qaraǵandy oblysy,
Nura aýdany
