FOTO: el.kz
Oblystyq polısııa departamentiniń basshysy, polısııa polkovnıgi Nurhat Orazbaevtyń aıtýynsha, 28 kólik «Kıber-sherıf» qurylǵysymen jabdyqtalǵan. Polıseılerge arnalǵan kólikke ornatylǵan jańa júıeniń birneshe artyqshylyǵy bar.
«Birinshiden, jol erejesin buzyp, qaýip tóndiretin júrgizýshilerdi anyqtaýǵa, olardy avtomatty túrde jaýapkershilikke tartýǵa múmkindik beredi. Ekinshiden, qurylǵynyń beınekamerasy 360 gradýstaǵy kórinisti baqylap, bir mezgilde 50 avtokólikti qadaǵalaı alady. Úshinshiden, jyldamdyqty shekten tys asyrý, qarsy baǵytqa shyǵý, kórinbeıtin memlekettik tirkeý nómir taǵý, urlanǵan nemese boryshkerler júrgizgen kólikti avtomatty túrde anyqtaıdy. Eń bastysy, quqyq buzýshylyq derekteri polısııa qyzmetkerleriniń qatysýynsyz, avtomatty túrde bazaǵa túsedi. Al elektrondy hattama týraly qaýly 1 apta ishinde kólik ıeleriniń mekenjaılaryna joldanady», deıdi N.Orazbaev.
Onyń aıtýyna qaraǵanda, «Kıber-sherıf» borttyq apparattyq kesheni bar kólikter Atyraý qalasyndaǵy, respýblıkalyq mańyzy bar jáne «Atyraý – Inder», «Saǵyz – Mııaly», «Qulsary – Teńiz» baǵytyndaǵy joldardy baqylaıtyn arnaıy patrýldik qyzmetkerlerge berildi. Tártip saqshylary jańa kóliktegi qurylǵyny 1 aqpanǵa deıin synaqtan ótkizedi.
Atyraý oblysy
