Aldymen Asqardyń jurt jadynda saqtalǵan óshpes erligin oqyrman qaýymnyń esine taǵy bir sala ketelik. 2022 jyldyń qarasha aıynda turǵyn úı kesheninde oryn alǵan alapat órtti sóndirý barysynda úsh adamnyń ómirin saqtap qaldy. О́kinishtisi sol, tilsiz jaýmen alysyp júrip ózi qaza tapty. El Prezıdenti Qasym-Jomart Toqaevtyń Jarlyǵymen I dárejeli «Aıbyn» ordenimen marapattaldy. Eń bastysy, óz qyzmetin adal atqarǵan, basyna tóngen qaýip-qaterden qashpaǵan esil erdiń artynda eldi súıýdiń, jerdi súıýdiń, óz júrek qalaýymen tańdaǵan mamandyqqa adaldyqtyń ómirsheń ónegesi qaldy. Saltanatty sátte sóz sóılegen Tótenshe jaǵdaılar vıse-mınıstri Baýyrjan Syzdyqov qutqarýshylar men órt sóndirýshilerdiń árdaıym erlikpen órnekteletin adal eńbekteri týraly keńinen tolǵap aıtyp berdi.
– Asqar Zabıkýlınniń erligi shyn mánindegi shynaıy patrıotızmniń, parasatty paryzdyń úlgisi, – dedi Baýyrjan Syzdyqov. – Esimi Qazaqstan Respýblıkasy Tótenshe jaǵdaılar mınıstrliginiń ǵana emes, búkil elimizdiń tarıhynda jazylyp qaldy. Keıingi urpaq, aǵa býynnyń ókshesin basyp kele jatqan jastar adaldyq pen jaýapkershiliktiń qandaı bolatyndyǵyn aldyńǵy býynnyń ókili Asqar tárizdi esil erlerdiń ónegesinen alady.
Eskertkish taqtaǵa jabylǵan aq jamylǵy alynǵannan keıin batyrdyń rýhyna taǵzym etip kelgen qaýym gúl shoqtaryn qoıyp, bir mınýt únsizdikpen eske aldy.
– Aqmolalyq qutqarýshylar kásibı is-qımyldarynyń arqasynda ótken jyly úsh júzden astam adamnyń ómirin saqtap qaldy, – dep atap ótti oblys ákiminiń birinshi orynbasary Eldos Ramazanov. – Asqardaı ul ósirgen, tálimdi tárbıe bergen ata-anasyna alǵys aıtamyz.
Eskertkish 3,7 metrlik tuǵyrǵa ornatylǵan. Aınalasy ádemilep abattandyrylǵan. Kórik berip turatyn kók óskin aǵash egilipti. Uqypty qoldyń taby ańǵarylyp turatyn tazalyqtyń reńi erge degen eldiń ystyq yqylasy men qoshemetin bildiretindeı. Beıbit zamanda naǵyz batyrlarǵa tán erliktiń eren úlgisin kórsetken Asqar beınesi aıtyp kelmeıtin apat kezinde namys pen jaýapkershiliktiń qashan da baǵalanatynyn meńzep turǵandaı.
Kókshetaý
