KTK arnasynyń jazýynsha, qalada ótken túni bolǵan jer silkinisinen jalpy 67 adam zardap shekti. Jaraqat alǵandardyń arasynda 12 bala bar. Bes turǵyn áli aýrýhanada jatyr.
Shyrt uıqyda jatqan turǵyndar jer silkinisin sezgen kezde japa-tarmaǵaı syrtqa umtylǵan. Qysylysyp-syǵylysyp ústińgi qabattan tómen qaraı túsip jatqan sátte keıbiri qulap mertikken. Zardap shekkenderdiń basym bóligi aýrýhanaǵa bas jaraqaty men sińirleriniń sozylýymen túsken. Onyń 55-i — eresek adamdar bolsa, qalǵany — bala.
Kóbisi úıinen emdelýge jiberilgen. Al jer silkinisinen záresi ushyp úshinshi qabattan sekirip ketken 33 jastaǵy áıel qazir jansaqtaý bóliminde jatyr. Oǵan ota jasaldy. Alǵan jaraqaty aýyr deıdi dárigerler.
- Jalpy qosarlanǵan aýyr dene jaraqaty, mıy shaıqalyp, bastyń jabyq jaraqaty, sany, jambasy synǵan. Kelgen kezde barlyq dárigerlermen qarap, shuǵyl túrde kómek kórsetilip, ota jasaldy. Qazirgi jaǵdaıy turaqty. Shoktan shyqty. Jansaqtaý bóliminde tıisti em alyp jatyr. Basqa eki naýqas travmatologııa jáne ortopedııa bólimshesinde keshendi tekseristen keıin alǵashqy kómek kórsetilip, qazir emdelip jatyr, – dedi Almaty jedel shuǵyl kómek kórsetý aýrýhanasynyń hırýrgııa boıynsha dırektordyń orynbasary Ermek Jeldibaev.
