Foto: Respublica partııasynyń baspasóz qyzmeti
Depýtat halyqpen kezdesý barysynda kelip túsken shaǵymdar boıynsha Respublica partııasynyń birqatar máslıhat depýtattarymen birlesip, Astana, Almaty qalalary jáne Almaty oblysynda birneshe stýdenttik jataqhanaǵa baryp, stýdentterdiń jaǵdaıymen tanysqan.
«Jastar arasyndaǵy úısizdik pen kúısizdik jaǵdaılary qoǵamnyń ózekti máselesine aınaldy. Kúni keshe Almatydaǵy hostelde bolǵan órtten 13 adam qaza tapty. Tilsiz jaýdyń saldarynan kóz jumǵandardyń arasynda stýdentter de bar. Ǵylym jáne joǵary bilim mınıstrliginiń derekteri boıynsha, elimizde 380 stýdenttik jataqhana bar. Alaıda, jataqhanalarda 23,7 myń oryn tapshy. Bul másele qazirgi ýaqytta Almaty, Astana, Shymkent qalalary jáne Soltústik Qazaqstan oblysynda ózekti», dedi Nurgúl Taý.
Depýtat Ulttyq statıstıka bıýrosynyń málimetine súıenip 2017 jyldan 2022 jylǵa deıin jataqhanalarda turatyn stýdentter sany 68,1 myńnan 73,1 myń adamǵa deıin óskenin aıtty. Oń úrdis bolǵanymen, qajettilik boıynsha kórsetkishter kóńil kónshitpeıdi. Jataqhanalar bilim berý obektilerine qoıylatyn sanıtarııalyq-epıdemıologııalyq talaptarǵa sáıkes kelmeıdi.
«Mysaly, S.Asfendııarov atyndaǵy Qazaq Ulttyq Medısınalyq Ýnıversıteti jataqhanalarynyń tozyǵy jetken. Stýdentterdiń jýynatyn bólmeleriniń tazalyq jaıy syn kótermeıdi. Bul, ásirese, medısına salasyndaǵy ýnıversıtetke saı kelmeıtin, jat jaǵdaı. Astana Medısnalyq Ýnıversıtetiniń jataqhanalarynda stýdentter arasynda bir shaǵyn bólmede 9-11 adamnan turý qalypty jaıtqa aınalyp ketken. Sondaı-aq atalǵan jataqhanalarda úı-jaılaryn jóndeýge jáne kútip ustaýǵa qoıylatyn talaptardy qatań saqtaýdy qadaǵalaý máselesin qolǵa alý qajet», dedi depýtat.
Depýtattyq saýalynda Nurgúl Taý stýdentterge qatysty taǵy birneshe máseleni tilge tıek etti. Olardyń ishinde jataqhanalardyń qaýipsizdigi, terrorızmnen qorǵaný deńgeıi, órt qaýipsizdigi deńgeıleriniń tómendigi bar. Keıbir jataqhanalar terrorıstik aktige qarsy qyzmetterdi shaqyrýǵa arnalǵan «dabyl túımesimen» jabdyqtalmaǵan bolyp shyqty.
Tyǵyryqtan shyǵýdyń birneshe jolyn ataǵan májilismen Úkimetke jeke kásipkerlik sýbektileri men memlekettik-jekemenshik seriktestigin qurý arqyly stýdentterge arnalǵan jataqhanalardy salý jáne onyń qyzmetin uıymdastyratyn ulttyq joba qurýdy, shyǵyndardyń jartysyn óteý maqsatynda «kraýdfandıng» tetigi boıynsha jeke jáne zańdy tulǵalardan ınvestısııa tartýdy, jastardyń páterdi jalǵa alý qarajatyn tóleý granttaryn engizýdi, kásiptik oqý oryndaryn stýdentterdi tolyqtaı jataqhanamen qamtamasyz etýge mindetteýdi jáne Eýropada stýdentter qaýymyna kórsetiletin túrli qoldaý joldaryn mysalǵa keltirip, atalǵan tetikterdi bizdiń elde de qoldanyp, bilim alyp jatqan jastardyń birqatar máselesin sheshýge bolatynyn aıtty.
