Ortalyq basshysy Maqpal Jumabaı qonaqtarǵa jýrnalısterdiń kúndelikti jumysynda qoldanýǵa yńǵaıly «Emle.kz», «Termincom.kz», «Sozdikqor.kz», «Qazcorpora.kz» syndy tildik jobalarmen qatar, qazaq tilindegi mátindi dybysqa aınaldyratyn jáne dybysty mátinge aınaldyratyn Telegram-bot júıesi týraly tolyǵyraq baıandap berdi.
Kezdesýge qatysqan Bas redaktorlar klýbynyń vıse-prezıdenti, respýblıkalyq «Ádilet» gazetiniń bas redaktory Muratbek Toqtaǵazın, Qazaq radıosynyń ardageri, belgili dıktor Kúlásh Moldahmetova, «Abai tv» telearnasynyń dırektory Erkin Tańatqanuly, «Qazaq gazetteri» JShS Bas dırektorynyń orynbasary Qambar Ahmetov, «Qazaqstan» RTRK» AQ ınternet dıreksııasynyń jetekshisi Qanat Áýesbaı, «Astana aqshamy» gazetiniń shef-redaktory Tólen Tileýbaı, Bas redaktorlar klýbynyń jaýapty hatshysy Bıbigúl Qulaman jáne basqa jýrnalıster óz oılary men usynystaryn ortaǵa saldy. Klýb músheleriniń aıtýynsha, jýrnalıster materıal daıyndaý barysynda kónergen sózderge nemese túsiniksiz termınderge jıi ushyrasady.
«Jyldam aqparat jazý kezinde mátinniń durystyǵyn tekserýge ýaqyt tapshy bolatyn sátter bar. Sondaıda joǵaryda atalǵan platformalardyń qaı-qaısy da kómekshi bola alady», deıdi baspasóz ókilderi.
Jıyndy júrgizgen Bıbigúl Jeksenbaı: «Tehnologııa – ómirimizdiń aınymas bólshegine aınaldy. Qazir jastarymyzdan bastap úlkenderge deıin áleýmettik jeli, ınternet múmkindikterin keńinen paıdalanady. Osy turǵydan alǵanda, «Til-qazyna» ortalyǵynda ázirlengen qazaq tilin damytý baǵytyndaǵy IT jobalar men túrli platformalardy joǵary oqý oryndary men mektepterde oqý-tárbıe úrdisine engizý, kópshilik paıdalanyp júrgen túrli ınternet resýrstarda qoljetimdi qylý asa mańyzdy dep bilemin. Bas redaktorlar klýby Ortalyqtyń tilge qatysty jańa ónimderin buqaralyq aqparat quraldary arqyly qoǵamǵa tanystyrýǵa árdaıym daıyn. Memlekettik tilimizdiń sapaly jáne tıimdi túrde damýyn uıymdastyrý til mamandary men BAQ ókilderine ortaq mindet», dedi.
Kezdesýde ǵylymı qaýymdastyq aldynda turǵan mańyzdy mindettiń biri – aýqymdy til modelin qurý máselesi de talqylandy. Sonymen qatar jasandy ıntellektini qazaqsha damytý qadamdary men osy baǵyttaǵy naqty izdenister jaıly tushymdy oılar aıtyldy. Jıyn sońynda M.Jumabaı qonaqtarǵa Ortalyqtyń keleshekke josparlanǵan irgeli jobalary týraly da jan-jaqty málimet berdi.
