El Prezıdentiniń «Bilim salasynda jańa formatty menedjerler daıarlaý týraly» tapsyrmasyna sáıkes, Oqý-aǵartý mınıstrligi «Jańa ózgeristerdiń 1000 kóshbasshysy» dep atalatyn joba jarııalaǵan edi. Respýblıka boıynsha bul jobaǵa 8 myńnyń ústinde úmitker qatysyp, sonyń 208-i jeńimpaz atandy. Eńbek jolyn 2010 jyly bastaýysh synyp muǵalimi bolyp bastap, 2022-2023 jyldary Q.Sátbaev atyndaǵy mektep dırektorynyń oqý-tárbıe isi jónindegi orynbasary bolyp istegen Orynkúl Mahmetova bes kezeńnen ótken synaqtyń nátıjesinde bilim berý uıymdarynyń basshysy bolýǵa laıyqtylardyń qatarynan tabyldy.
– «Jańa ózgeristerdiń 1000 kóshbasshysy» dep atalatyn joba jarııalaǵanda maǵan mektep basshysy Amankúl Tilemisova soǵan qatysýǵa keńes berdi. Árıne, sol kezde joba synaqtaryn sátti tapsyryp, Amankúl Tóleýbaıqyzy zeınetkerlikke shyqqanda ol kisiniń ornyna dırektor bolyp kelemin dep oılaǵanym joq, – deıdi keshegi basshysynyń ornyna taǵaıyndalǵan Orynkúl tolqynysyn jasyra almaı.
Jańasha taǵaıyndaýdyń mánin Ulytaý oblystyq bilim basqarmasynyń basshysy Sapýra Tólekova túsindirip berdi. «Mekteptiń burynǵy basshysy kúni keshe ǵana zeınet jasyna toldy. Biz qalyptasqan tártip boıynsha dırektordyń mindetin atqarýshy taǵaıyndap, konkýrs jarııalaımyz degen oıda bolǵan edik. Sóıtip turǵanda, mınıstrlikten joba jeńimpazdary bekitilgen tizim keldi. Jeńimpazdardyń biri Orynkúl Dýmanbekqyzymen áńgimelestik. Ol kelisim berdi. Sóıtip, alǵash ret oblysta, bálkim respýblıkada eń birinshi bolyp respýblıkalyq kadr rezervine qabyldanǵan úmitkerlerdiń arasynan mektep dırektory taǵaıyndaldy», dedi ol.
Bul taǵaıyndaý elimizde júrgizilip jatqan reformalardyń qoǵamnyń ár salasyn qamtyp, tereńdeı túskenin aıǵaqtaıdy.
Ulytaý oblysy,
Sátbaev qalasy
