Soltústik Qazaqstan oblysynyń sanıtarııalyq-epıdemıologııalyq baqylaý departamentiniń basshysy Áset Jumataevtyń aıtýyna qaraǵanda, oblystaǵy 13 ákimshilik bólinistiń 10-ynda qyzylshamen aýyrý deregi tirkelgen. Tek úsh-aq aýdan bul dertten ada.
Qyzylshanyń negizgi oshaǵy Petropavl qalasynda shoǵyrlanǵan. Barlyq syrqattyń 270-i, ıaǵnı 86%-y qalanyń úlesinde. Aýdandar arasynan Esilde – 12 adam, al Maǵjan Jumabaev, Qyzyljar, Mamlıýt aýdandarynda 6 adamnyń qyzylsha juqtyryp alǵany belgili bolyp otyr.
Jas shamasy boıynsha eń kóp aýyrǵandar – 15 jasqa deıingi jasóspirimder. Bul jastaǵylardyń arasynda syrqattanǵandar sany – 184 adam, ıaǵnı 58%. Odan keıingi eń kóp aýyrǵandar – 15 pen 19 jastaǵylar, bulardyń sany – 66. Syrqatqa ushyraǵandardyń 87%-y, ıaǵnı 274 adam – ekpe almaǵandar. Sonyń ishinde 58 syrqat vaksınadan bas tartýy sebebinen aýrý juqtyrǵan.
Oblystyń dárigerleri qyzylshanyń shyǵý oshaqtaryn qurtýǵa tyrysyp jatyr. Búgingi tańda qyzylshanyń 15 belsendi oshaǵy anyqtalyp, qatań baqylaýǵa alynǵan. Sonymen birge 99 úıishilik oshaqtar anyqtalǵan. Qazir syrqattanǵandarmen qarym-qatynas jasaǵan 22 132 adam anyqtalǵan. Sonyń ishinde 72 saǵat ishinde qatynasta bolǵan barlyq 1 602 adamnyń 1 282-sine ekpe egildi.
«Jyǵylǵanǵa – judyryq» degendeı, qyzylshanyń ústine tumaýdyń da maýsymdyq kóbeıýi artyp otyr. 2023 jyldyń 1 qazany men 2024 jyldyń 17 qańtary aralyǵynda tumaý tıgen 55 687 adam tirkelgen. Bul byltyrǵy epıdemııalyq maýsymnyń sáıkes merzimine qaraǵanda 1,7 ese artyq. Jas shamasyna qaraǵanda aýyratyndardyń negizgi úlesi 14 jasqa deıingi balalar arasynda. Barlyq syrqattyń 66 paıyzy osy jastaǵylardyń úlesinde. Tumaýdyń da negizgi oshaǵy Petropavl qalasy bolyp otyr. Barlyq syrqattyń 37%-y Petropavl qalasynyń úlesinde. Aýdandar arasynda Qyzyljar alǵa shyqqan. Bul aýdanda barlyq syrqattyń 30%-y turady. Al Maǵjan Jumabaev, Ǵabıt Músirepov, Aqqaıyń aýdandarynda 5-6 syrqattan bar ekeni anyqtalǵan. Osyǵan baılanysty Áset Jumabaev halyqqa kóp adam shoǵyrlanǵan jerge barmaýdy jáne múmkindiginshe qoǵamdyq kólikke minbeýdi usynyp otyrmyz deıdi. Sonymen birge ol halyqqa betperde taǵyp júrýdiń paıdaly ekenin jetkizdik dedi.
Soltústik Qazaqstan oblysy
