О́tken jyly memleketimizdiń saıasaty, Parlamenttiń jumysy saıası reformalarǵa baǵyttaldy. Ekonomıkaǵa, bıznesti damytýǵa, adamdardyń tabysyn arttyrýǵa zańdyq negizdemeler jasaldy. Parlament 90-nan astam zań qabyldady, onyń basym bóligi ekonomıkamyzdy, kásipkerlikti damytýǵa, halyqtyń ál-aýqatyn arttyrýǵa baǵyttaldy. Prezıdenttiń suhbatta aıtqan básekeli ekonomıka júıesin qurý, ekonomıkany ártaraptandyrý jáne monopolııadan aryltý, ınfraqurylymdy jańǵyrtý, bıznesti qoldaý, ınvestısııa tartý, 2029 jylǵa qaraı ishki jalpy ónimdi qazirgiden eki esege arttyrý jumystary sátti júzege asyrylatynyna senim mol.
Memlekettiń basty mindetiniń biri – zańnyń múltiksiz oryndalýyn, tártiptiń qatań saqtalýyn tolyq qamtamasyz etý. Sondyqtan zań buzǵan kez kelgen adam jaýapqa tartylady. Al zań men tártipti saqtaý máselesine azamattardyń ıdeologııalyq ustanymy men saıası kózqarasynyń esh qatysy joq. Zań bárine ortaq.
Elimizde bıliktiń is-áreketine jarııa túrde kelispeýshilik bildirýge tolyq múmkindik bar. Azamattar ózin tolǵandyratyn másele týraly ashyq aıta alady. Elimizde beıbit jınalystardy retteıtin demokratııalyq sıpattaǵy zań bar. Jaqynda petısııalardy tapsyrý jáne qaraý tártibin retteıtin zań qabyldandy. Beıbit sherýge tyıym salynbaıdy, al jappaı tártipsizdiktiń kez kelgen túrine qatań tosqaýyl qoıylady. Elimizde zań men tártip qana ústemdik qurýǵa tıis.
Ishki ister organdarynda áıelderdi zorlyq-zombylyqtan qorǵaýmen shuǵyldanatyn mamandardyń shtaty qalpyna keltirilip, olardyń quzyreti kúsheıtildi. Endi otbasyndaǵy turmystyq quqyq buzýshylyq qylmystarǵa qatysty is qozǵaý úshin zorlyq-zombylyqtan japa shekken adamnyń aryzy qajet emes. Jábirlenýshi qaıta-qaıta qysymǵa ushyramaýy úshin budan bylaı mundaı iske qatysty taraptarǵa ekinshi ret tatýlasý múmkindigi berilmeıdi.
Qazir Úkimettiń ónimdi jumys isteýi úshin múmkindikteri jetkilikti. Atqarýshy bılikke jan-jaqty oılastyrylǵan is-qımyl strategııasy jáne óz mindetin tıimdi júzege asyrýǵa degen ynta-jiger ǵana qajet. Derbestikke jáne qosymsha ókilettikke ıe bolýǵa umtylǵan Úkimet qalaǵanyn aldy. Biraq «almaqtyń da salmaǵy bar», olarǵa qoıylatyn talap ta kúsheıdi. Úkimet muny túsinýge tıis.
Úkimet memleket pen bıznestiń qarym-qatynasyn qaıta qaraýǵa múmkindik beretin jańa Salyq kodeksin ázirlep jatyr. Salyq júıesin jetildirgende, tek tólem jınaý tásilimen shektelip qalmaý óte mańyzdy. Bir jaǵynan, ınvestorlarǵa qolaıly jaǵdaı jasaý kerek. Ekinshi jaǵynan, bıýdjet kirisiniń azaıyp ketpeýine mán bergen jón. Iаǵnı tarazy basyn teń ustaý qajet. Jańa Bıýdjet kodeksi de – óte mańyzdy qujattyń biri. Biz «qazyna qarajatyna» degen kózqarasymyzdy ózgertip, ony tıimdi, jónimen ári únemdep jumsaýǵa tıispiz.
Barlyq deńgeıdegi sheneýnik pen basshy qoǵamnyń tamyryn tap basa bilýge, azamattardyń muń-muqtajyn tyńdap-túsinýge, soǵan sáıkes der kezinde nátıjeli sharalar qabyldaýǵa jáne durys sheshim shyǵarýǵa qabiletti bolýy kerek. Bul – eń basty talap. Olar «adam memleket úshin emes, memleket adam úshin» degen qaǵıdatty berik ustanýǵa tıis.
Memleket basshysy bastaǵan osyndaı erkin ári ashyq suhbattardyń kóp bolǵany durys. Úkimet basshysy, kúshtik qurylymdar, mınıstrler, oblys ákimderi árbir atqarylǵan jumystarǵa osylaı esep berýi qajet. Biletinim, halyq osyndaı ashyq áńgimege, árbir qabyldanǵan sheshimdi túsindirý baǵytyndaǵy aqparatqa zárý.
Ádil JUBANOV,
Májilis depýtaty
