Otyrysqa óńirlik qolbasshylyqtardyń qolbasshylary, Ulttyq ulan Akademııasynyń bastyǵy, áskerı bólim komandırleri, bas basqarmalar men basqarmalardyń, sondaı-aq áskerı polısııa qyzmetteriniń, ortalyqtardyń jáne derbes bólimderdiń bastyqtary qatysty.
Aıta keteıik, óńirlik qolbasshylyqtar men barlyq áskerı bólim komandırleri otyrysqa onlaın-rejımde qosyldy.
Áskerı keńeste 2023 jylǵy áskerdiń qyzmettik-jaýyngerlik is-áreketi qorytyndylanyp, aldaǵy kezeńge arnalǵan mindetter qoıyldy.
Bas qolbasshynyń orynbasarlary bólimder men bólimshelerdiń qyzmettik-jaýyngerlik is-áreketin uıymdastyrý, kadrlardy nyǵaıtý, áskerı tártip pen quqyqtyq tártipti saqtaý boıynsha máseleler kóterdi.
Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary general-maıor Qaırat Úmbetov «Tárbıe jumysyn uıymdastyrý, jeke quramnyń moraldyq-jaýyngerlik rýhyn arttyrý jáne áskerı ujymdardy biriktirýdegi eleýli kemshilikter» týraly baıandama jasady.
«Memleket basshysy IIM men Ulttyq ulan basshylyǵyna qazaqstandyq patrıotızmdi nyǵaıtý boıynsha birqatar tapsyrma júktegen edi. Bul baǵytta aýqymdy jumystar júrip jatyr. О́tken jyly 11 áskerı qyzmetshi memlekettik nagradamen marapattaldy. Ulttyq ulannyń arnaıy jasaq bólimshesi týraly «Búrkit» kórkem fılmi kórermenderge jol tartty. «Jas búrkit» áskerı-patrıottyq qozǵalysynyń 20 jyldyǵyn atap óttik. Ulttyq ulan boıynsha 40-qa jýyq ashyq esik kúni uıymdastyryldy», dedi baıandama barysynda áskerdiń bas tárbıeshisi.
О́z kezeginde «Jeke quram arasyndaǵy áskerı tártiptiń, zańdylyq pen quqyqtyq tártiptiń jaı-kúıi» taqyrybynda Áskerı polısııa bastyǵy polkovnık Qýat Tomashınov baıandama jasady.
Ulttyq ulan Bas qolbasshysy baıandamalar aıaqtalǵan soń tártip pen tárbıe jumysyna qatysty birqatar tapsyrma berdi. Sondaı-aq quqyq buzýshylyqqa jıi jol bergen áskerı bólim komandırlerin tyńdap, olqylyqtardy aqpanda ótetin komandırler daıyndyǵynda egjeı-tegjeıli qarastyratynyn eskertti.
Jıyn barysynda áskerdiń jaýyngerlik jáne jumyldyrý daıyndyǵyn arttyrý, jeke quramnyń moraldyq-psıhologııalyq jaı-kúıin nyǵaıtý máselelerine erekshe nazar aýdaryldy.
Shara sońynda 2024 jylǵy jaýyngerlik saıys bastamashysy «Shyǵys» óńirlik qolbasshylyǵyna qarasty 5511 áskerı bóliminiń komandıri polkovnık Aıbek Isenov ásker jeke quramyna úndeý jasady.
Alqaly jıyn qorytyndysy boıynsha basshylyq etý jáne oryndaý úshin óńirlik qolbasshylyqtar men áskerı bólimderge jiberiletin Áskerı keńes qaýlysy qabyldandy. Is-sharada Bas qolbasshy Spartakıada jáne sporttyq-buqaralyq jumys jeńimpazdaryn dıplomdarmen jáne kýboktarmen marapattady.
