Mereıimizdi ústem etken Olımpıada

Álemniń 70 elinen 1900-ge jýyq sportshy qatysyp jatqan dodanyń alǵashqy kúninde  shań­ǵymen tuǵyrdan sekirý saıysynda Ilıa Mızernyh chem­pıon atandy. Ilıa – 214 upaı jınap, qysqy jasóspirimder oıyndarynda al­tyn alǵan elimizdiń tuńǵysh sport­shysy.

Bul Ilıa Mızer­nyh­tyń ha­lyq­­aralyq básekedegi alǵashqy altyny emes. Ol bir jyl buryn II Azııa balalary oıyndarynda jekeleı synda top jaryp, aralas komandalyq synda Sofıa Shısh­kına ekeýi kúmis júldeni jeńip alǵan. Sondaı-aq Ilıa elimizdiń IV qysqy jastar sport oıyn­darynda qarsylas shaq ke­l­tirmegen. Almaty men Kemerovo qalasynda ótken dú­birli jarys­tarda da Ilıa K-60 tramplınnen sekirse, Ońtústik Koreıada K-90, ıaǵnı 90 metr bıik­­­ten qalyqtady.

Jalpy, osyǵan deıingi úsh Olımpıadada qorjynǵa tek 1 kú­mis pen 4 qola júlde túsken edi. Ga­lına Vıshnevskaıa-Sheporenko 2012 jyly kúmis jáne qola medal jeńip alsa, Sergeı Malyshev ta úzdik úshtikten kórindi. 2016 jyly Arına Pantova men Elı­zabet Tursynbaeva qola júldege ıe boldy. Al 2020 jyly birde-bir sportshymyz júldege ıe bola almady. Sondyqtan I.Mızer­nyhtyń jeńip alǵan altyn medali qysqy oıyndarda mereıimizdi ústem etti.

Short-trekshi qyz Polına Omel­chýk qysqy jasóspirimder Olımpıadasynyń qola júldegeri atandy. Ol 1000 metrge júgirý­den márege úshinshi bolyp kel­di. Onyń ýaqyt kórsetkishi – 1:41.600.

Qýanarlyǵy, Polına – ózimiz­diń «ónim». Iаǵnı sportshy qyz – Q.Mu­ńaıt­­­pasov atyndaǵy mektep-ın­ter­nat-kolledjdiń 11-synyp oqýshysy.

– Bul jeńis – men úshin umytylmas qýanysh. Barlyǵyn bapkerdiń nusqaýy boıynsha iste­dim. Qurǵan taktıkamyz sát­ti oryndaldy. Olımpıadanyń deń­geıi basqasha bolady eken. Mundaı úlken dodaǵa birinshi ret qatysyp otyrmyn. Búgingi qola júlde meni sportshy retinde áli kóp eńbektený kerek ekenin ańǵartty. Armanym – Olımpıada chempıony ataný, – dedi P.Omelchýk.

Taǵy bir jaǵymdy jańalyq keshe kelip tústi. Qazaq­stan ko­mandalyq saıysta ta júlde alýdy úırendi. Hokkeıden jastar quramasy Olım­pıadanyń qola júldegeri atandy. Temirlan Aı­boluly, Bek­sultan Maqysh, Ádilhan Sat­tar, Arman Tólen, Ánýar Ahmet­janov syndy qazaǵy kóp komanda júldeli úshinshi oryn úshin saıysta Aýstrııa qu­ra­masyn qapy qaldyrdy. Esep – 6:5, bizdiń paıdamyzǵa sheshildi.

Jalpy, dúbirli doda belortasynan asqanymen, qazirdiń ózinde nátıje jaman emes. Bolashaqta osy jas sportshylar ulttyq qu­ra­many jeńiske jeteleıdi dep úmittenemiz.

Dúbirli doda 1 aqpanda aıaq­talady.