Ekonomıka • 26 Qańtar, 2024

Altyn quımanyń bási joǵary

190 ret

kórsetildi

2 mın

oqý úshin

Qadirin bilgenge altyn quıma senimdi ınvestısııa quraly bola alady. Onyń naryqtaǵy ótimdiliginiń basty kepili – bank pen banktik emes aıyrbastaý pýnkteri klıentke sol mezette aqshasyn tóleı otyryp, altyn quımalardy keri satyp ala alatyndyǵynda. Osyǵan qyzyqty ma eken, byltyr ekinshi deńgeıli bankter men jekelegen banktik emes aıyrbastaý pýnkterinde jalpy salmaǵy 1,6 tonna bolatyn 38 729 altyn quıma saýdalanypty.

Egemen Qazaqstan

Negizinde Ulttyq bank bul baǵdarlamany 2017 jyly iske qosqan bolatyn. Sodan beri jalpy salmaǵy 5,4 tonnaǵa jýyq 151 574 altyn quıma satylǵan.

Alýshylarǵa altyn quıma bes túrli salmaqta usynylady: 5, 10, 20, 50 jáne 100 g. 2021 jyly satyp alýshylar arasynda eń kóp suranysqa ıe bolǵan túri – 100 gramdyq quıma. Satylǵan quımalar arasyndaǵy onyń úlesi – 28%, ıaǵnı 10 910 dana. Odan keıin 5 gramdyq quıma suranysqa ıe, 9 795 dana (25%) satyldy. 10 gramdyq quımadan 9 409 dana (24%), 50 gramdyq quımadan 4 818 dana (13%), 20 gramdyq quımadan 3 797 dana (10%) satyldy. Altyn quımalar Almaty, Astana, Shymkent qalalarynda kóp saýdalanypty.

Baǵdarlama bastalǵaly ekinshi deńgeıli bankter men jekelegen banktik emes aıyrbastaý pýnkteri jalpy salmaǵy 737 kılo bolatyn 28 156 altyn quımany keri satyp alǵan. Bul – jalpy satylǵan quımalardyń 19%-y. Olar keri satyp alǵan altyn quımalardyń barlyǵy derlik Ulttyq banktiń fılıaldary arqyly halyqqa qaıtarymsyz talappen satylady. Árbir quıma qorǵaý elementterimen qaptalǵan (quımanyń aına beti, mıkromátin jáne jıegi bar) jáne arnaıy qorapqa salynyp shyǵady. Sol arqyly quımanyń ashylǵan-ashylmaǵanyn ońaı tekserýge bolady. Qorǵap turatyn qorap, sondaı-aq sapa sertıfıkaty bolyp sanalady. Sondyqtan altyn quımany uqypty saqtap, qorabyn búldirmeýge keńes beriledi.

Qazir altyn quımalardy Halyk Bank, Eýrazııalyq Bank, Jusan Bank, SentrKredıt banki, sondaı-aq jekelegen banktik emes aıyrbastaý pýnkterinen satyp alyp, keri satýǵa bolady.