Búgin men bolashaqtyń aıqyn baǵdary

Oıly ári asa ózekti máseleler tóńire­ginde qoıylǵan saýaldarǵa Memleket basshysy óte aýqymdy problemalardy ashyq, barynsha aıqyn túrde aıtyp bergen. Prezıdent keshe, búgin jáne bolashaq uǵymdary aıasynda tolǵana otyryp, qazirgi ıaǵnı zamanaýı kezeńdegi dúnıe júzindegi elderdiń basym kópshiligindegi alýan túrli keleńsizdik, kóptegen syn-qater týyndaǵan shaǵynda elimiz qandaı belesterdi baǵyndyrýy kerek degen máselege kóbirek mán berdi. Suhbatta halyq atqarýǵa tıis negizgi mindetterdiń naqty atalýy belgili bir dárejede strategııalyq mindettermen úndes ekenin basa aıtqan jón.

О́tken jyly qyrkúıekte Q.Toqaev­tyń Qazaqstan halqyna arnaǵan Joldaýy elimizde jańa ekonomıkalyq úlgige kóshý, rýhanııat salasy boıynsha tyń ári tegeýrindi is-sharalardy, ishki jáne syrtqy saıasat máseleleri boıynsha atqarylýǵa tıis mindetterdi meılinshe naqty jáne múmkindikterdi jaqsy eskere otyryp, belgilep bergen edi. Arada kóp ýaqyt ótpese de, suhbatta osy mindetterdiń oryndalý barysyna sholý jasalǵan.

Ekonomıka, rýhanııat, saıasat salasynda ábden oılastyrylǵan ári jurtshylyq kóńilinen shyǵatyn, ǵylymı turǵydan dáleldenip, dáıektelýi esh kúmán týǵyzbaıtyn batyl, tegeýrindi reformalardy júzege asyrý, aqıqat­qa júginsek, aıtýǵa ǵana ońaı. Ondaı iri ózgerister qalyń jurtshylyqtyń, Úki­mettiń, túrli ınstıtýt pen bılik tar­maqtarynyń, zań shyǵarýshy organ­nyń jumyla atqaratyn mindetine jatady. Al jappaı jumylý úrdisi el birligi, ult tutastyǵy, qazaqy uǵymmen aıtqanda, bir jeńnen qol, bir jaǵadan bas shyǵarǵanda ǵana júzege asady. Prezıdenttiń aıryqsha astyn syzyp, ekpin túsirip aıtqany da osy. Birlik qana barsha tirligińe, baǵyndyrar belesińe, belgilegen mindetińdi eńserýge bastaıdy.

Bir jaıtqa erekshe den qoıǵan abzal: ol –  «Biz ozyq oıly ult retinde tek qana alǵa qaraýymyz kerek» degen oı. Aqıqatynda da solaı. Ozyq oıly ult qana bolashaǵyna senimmen qaraı alady. Osyndaı ult qana halyqtyń áleýmettik hal-ahýalyna basty nazar aýdarady. Investısııa tartý, ekonomıkany ártaraptandyrý, bilim berý isin ozyq tehnologııalyq ınnovasııaǵa saı uıymdastyrý, ulttyń jańa sanasyn qalyptastyrý men qoǵamnyń qun­dylyqtar júıesin jańǵyrtý, halyq­tyń ǵasyrlar boıǵy jasaǵan ǵalamat murasyn, ulttyq bolmysyn jańǵyrtý – bári de tóńiregińdi jiti baǵamdap, aıqyn baǵyt-baǵdar ustanýǵa, atqarylýǵa tıis mindetterdi abyroımen, adal oryndaýǵa bastaıdy, ultjandylyqty, patrıotızmdi kúsheıtedi. Al bular, sa­ıyp kelgende, ádiletti Qazaqstanǵa aıqyn joldy nusqaıdy.

Máýen HAMZIN,

«Bolashaq» akademııasynyń professory, fılologııa ǵylymdarynyń doktory