Foto: kaz.inform.kz
Máýlen Áshimbaev atap ótkendeı, óńirlerge sapary kezinde senatorlar kásipkerlermen jáne ınvestorlarmen mindetti túrde kezdesedi. Osyǵan baılanysty el boıynsha atalǵan sala ókilderin alańdatyp otyrǵan úsh negizgi máseleni qamtıtyn blok qurylǵan edi.
«Birinshi másele – qandaı da bir túıtkilder boıynsha sheshimderdi kelisý merziminiń uzaqtyǵy. Bizde adamdar jaýapkershilikti óz moınyna alǵysy kelmeıdi, júıe solaı jumys isteıdi. Osyǵan baılanysty ortalyq nemese jergilikti memlekettik organdar tarapynan sheshýdi talap etetin máseleler keıinge qala beredi. Sondyqtan ınvestorlarmen jumys isteýdiń barlyq prosedýrasyn naqty jazý kerek. Ekinshi másele, ken oryndary týraly keıbir aspektiler boıynsha aqparatqa qol jetkizýdiń qıyndyǵymen baılanysty. Osy rette ınvestorlar úshin qajetti aqparattar boıynsha aýdıt júrgizý qajet. Úshinshi másele, memlekettik organdar arasyndaǵy úılestirýdiń jetkiliksiz deńgeıde bolýyna qatysty. Bul ortalyq atqarýshy organdar arasynda da, sondaı-aq ortalyq jáne jergilikti atqarýshy organdar arasynda da kezdesedi. Iаǵnı ortalyq deńgeıde sheshimder qabyldanǵanymen, olar jergilikti jerlerde tolyq iske asyrylmaıdy», dedi Palata spıkeri.
Máýlen Áshimbaev Senat óz tarapynan osy máselelerdi sheshýge jáne qajet jaǵdaıda tıisti zańnamalarǵa ózgertýler engizýge yqpal etýge daıyn ekenin aıtty.
