Qazirgi jahandaný úrdisin jiti baqylap otyrǵan Memleket basshysy Q.K. Toqaevtyń tikeleı qolǵa alýymen jańa Qazaqstannyń jarqyn bolashaǵyn jalyndy jastardyń úles salmaǵymen qurý úshin naqty qadamdar men keshendi baǵdarlamalar júzege asyrylýda. Prezıdentimiz Qasym-Jomart Kemeluly halyqqa arnaǵan ár Joldaýynda, Úkimettiń keńeıtilgen otyrystarynda, kezdesýlerde jastar tárbıesin júıeleý, bilim berýdiń álemdik standarttaryn qamtý, olardy bilim alýmen qatar eńbekke tartý máselesin alǵa tartyp, nazarynan tys qaldyrǵan emes. Prezıdent 2024 jyldyń 3 qańtarynda qazaq baspasózi «Egemen Qazaqstan» gazetine bergen aýqymdy suhbatynda óz sózin qorytyndylaı kele: «Biz ozyq oıly ult retinde tek qana alǵa qaraýymyz kerek» dedi. Bul qazaqstandyqtar úshin árbir azamat óz eliniń patrıoty retinde ortaq otanymyzdyń gúldenýine óz úlesin qosýy tıis, orta, joǵary jáne joǵary oqý ornynan keıingi bilim berý uıymdary úshin tal shybyqtaı býyny qatpaǵan óskeleń jastarǵa tereń tálim berýdi júkteıdi.
Memleketimizdiń strategııalyq damý josparyn saı, jańa 2024 jyldyń alǵashqy jumys kúni QR ǴjJB mınıstrligi jastar tárbıesine tyń ózgerister alyp keletin, talantty jastarǵa jańa múmkindikter beretin jańa ádistemelik Nusqaýlyqtardy bekitti. Qazaqstan Respýblıkasynyń Ǵylym jáne joǵary bilim mınıstri S.Nurbektiń 2024 jylǵy 4 qańtardaǵy №2 buıryǵymen bekitilgen «Joǵary jáne joǵary oqý ornynan keıingi bilim berý uıymdarynyń bilim alýshylarynyń ıntegraldyq, onyń ishinde áleýmettik GPA engizý boıynsha ádistemelik usynymdardy bekitý týraly» ádistemelik Nusqaýlyq elimizdegi JOO-nda bilim alyp jatqan belsendi jáne talantty jastardyń áleýmettik dárejesin aıqyndaıtyn mańyzdy qujat bolyp tabylady.
Atalmysh Nusqaýlyq Qazaqstannyń bilim berý júıesine oń áser etip, jastardyń sabaqtan bos ýaqytynda ǵylymmen, ónermen, sportpen aınalysyp, túrli qoǵamdyq jumystarǵa belsene aralasýyna jol ashady. Sabaqtan bos ýaqytynda osy maqsatta eńbek etip, nátıje kórsetken jastardyń akademııalyq vedomstaryna akademııalyq GPA baldarynan bólek, áleýmettik GPA ball qoıylatyn bolady. Áleýmettik GPA ball stýdenttiń boıyndaǵy tabıǵı daryny men talantyn baǵalaýshy kórsetkish retinde bilim alýshynyń akademııalyq vedomstaryna jáne dıplomyna jazylatyn bolady. Bul baǵalaý úrdisi elimizdiń bilim berý júıesine enip otyrǵan jańa baǵalaý úrdisi retinde Jumabek Táshenev atyndaǵy ýnıversıtette kafedra májilisterinde, fakýltet keńesterinde jáne Ǵylymı keńes otyrysynda keńinen tanystyryldy. Ýnıversıtetimizdiń bilim alýshy jastary men Stýdenttik ózin-ózi basqarý quramynyń músheleri jańa baǵalaý júıesin erekshe qýanyshpen qabyldady. «El ishi óner kenishi» degendeı, joǵary oqý oryndarynyń qabyrǵasynda talantty da daryndy jastar jeterlik. Bul jańa júıe tabıǵı daryny bar talantty jastardyń tez tanylyp, elimizge qyzmet etetin tanymal tulǵalarǵa aınalýyna óz septigin tıgizetin tyń ózgeristerdiń biri bolyp otyr.
Bilim alýshylar úshin taǵy bir qýanarlyq jáıt, salalyq mınıstrlik jastardy memleket tarapynan qoldaý maqsatynda joǵary oqý oryndaryndaǵy olımpıadalyq sport túrlerimen aınalysatyn stýdenttik komandalardyń tizimin alýda. Bul degenimiz, túrli sporttyq jarystarǵa ketetin is-sapar, jol-qarajat shyǵyndary sııaqty qordalanǵan máselelerdiń túıini sheshiledi degen úmitimizdi arttyryp otyr.
Búgingi tańda 35 bilim berý baǵdarlamasy boıynsha bakalavrıat, 8 bilim berý baǵdarlamasy boıynsha magıstratýra baǵytynda mamandar daıyndap otyrǵan ýnıversıtetimizdiń basty mıssııasy – bilim alýshylardyń qajettilikterin barynsha qanaǵattandyrýǵa beıimdelý. Ýnıversıtettiń negizin qalaýshy, Dırektorlar keńesiniń tóraǵasy, QR UǴA akademıgi, p.ǵ.d., professor Ońalbaı Aıashevtiń: «Ýnıversıtette akademııalyq adaldyq erejeleri barynsha saqtalýy tıis. Stýdentterge ýnıversıtet ákimshiligi jáne professor-oqytýshylar quramy aıryqsha qamqorlyq tanytýy kerek. Stýdent ýnıversıtettegi basty tulǵaǵa aınalýy qajet. Sonda ǵana ýnıversıtettiń ımıdji qalyptasady» degen ustanymy bilim berý uıymynyń basty qaǵıdasyna aınalǵan.
Bıtursyn Ǵalymjan Shámshidinuly,
J.A. Táshenev ýnıversıtetiniń áleýmettik jáne tárbıe isiteri jónindegi prorektory,
Ulttyq Zań akademııasynyń korrespondent múshesi
