Ǵasyr jasaǵan keıýana Qaraǵandy oblysy Osakarov aýdanynda turady. 1943 jyly 18 jasynda Voronej oblysynan 2-Ýkraına maıdanynyń 65-evakýasııalyq aýrýhanasyna jiberilgen jas medbıke maıdan dalasynan jetkizilgen jaralylardy ornalastyrý, dárigerlerge operasııa kezinde ıne salýǵa jáne tańýǵa, dári-dármekter taratý, tipti arasynda eden jýý, pesh jylytý, kıim jýý sekildi isterde qolǵabys etken. Onyń meıirimdiligi men senimdiliginiń, tabandylyǵynyń arqasynda tiri qalýdan úmiti az jaralylar da tez ońalyp, aıaqqa turǵan. Aýyr jaralanǵandarǵa jyly sózimen demeý bola bilgen.
– Sheksiz meıirimińiz, adal eńbegińiz ben qajymas qaıratyńyz úshin sizge alǵys aıtamyz. Siz júrip ótken ómir joly – naǵyz patrıotızmniń, janqııarlyq pen ómirge degen súıispenshiliktiń úlgisi, – dedi Osakarov aýdany qorǵanys isteri bóliminiń basshysy, maıor Vladımır Gerega.
Anna Kotova jeńisten bir jyl ótken soń ǵana elge oraldy. 1977 jyly zeınetke shyqqanǵa deıin ol Osakarovtaǵy densaýlyq saqtaý mekemelerinde jumys istedi. Ardager ana ózine arnaıy kóńil bólip kelgenderi jáne jyly lebizderi úshin áskerı qyzmetshilerge alǵys aıtty. «Týǵan jerdi kózdiń qarashyǵyndaı qorǵap, qasterleı bilińder! Elimizde tynyshtyq pen bereke-birlik bolsyn», degen izgi tilegin de jetkizdi.
Anna Nıkanorovna dańqty eńbegi úshin II dárejeli Otan soǵysy ordenimen, «1941-1945 jyldarda Uly Otan soǵysyndaǵy Germanııany jeńgeni úshin», «Ýkraınanyń fashıstik basqynshylardan azat etilgenine 60 jyl» medaldarymen, «Sanıtarlyq qyzmettiń úzdigi» belgisimen marapattalǵan.
