Kollajdy jasaǵan – Záýresh SMAǴUL ,«EQ»
Sonymen Májilis spıkeri Erlan Qoshanovtyń tóraǵalyǵymen ótken Palatanyń jalpy otyrysynda «Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý» týraly zań jobasy qaraldy. Qujatta áýeli medısına qyzmetkerleriniń kásibı jaýapkershiligi saqtandyrylatyny kórsetilgen. Bul rette medısınalyq uıymdardyń árqaısysy saqtandyrý kompanııasymen shart jasasýy kerek. Este bolsa, byltyr medısına mamandarymen arazdasyp, tipti jaǵadan alǵan azamattardyń áreketi áleýmettik jelide tarady. Endi osyndaı nemese osyǵan uqsas keleńsiz jaǵdaılarda saqtandyrýdyń kómegi tıedi. Sondaı-aq zań jobasy sheńberinde medısına mamandarynyń quqyǵyn qorǵaý kúsheıtilip, jańa áleýmettik kepildikter engiziletinin bildik. Májiliste zań jobasy týraly baıandama jasaǵan depýtat Gúldara Nurymova usynylǵan ózgerister men tolyqtyrýlardyń artyqshylyǵy týraly habarlady. Sonymen qujatta «Qazaqstannyń eńbek sińirgen dárigeri» qurmetti ataǵyna usynylǵan sala maıtalmandaryna 1 000 AEK kóleminde birjolǵy tólem tólenetini kórsetilipti. Buǵan qosa respýblıka kóleminde jyl saıyn «Mamandyq úzdigi» degen ataýmen baıqaý ótkizilip, onyń jeńimpazyna 500 AEK kóleminde tólem tabystalýy múmkin. Shyn máninde, munyń ózi – jumysyna tııanaqty, isin jetik biletin medısına salasynyń bilgirlerine úlken qoldaý. Aldyńǵy aǵa býyn dárigerlerdiń izimen salanyń úzdigi atanýǵa umtylǵan jastardy yntalandyrýdyń taǵy bir tıimdi tetigi.
Usynylǵan zań jobasynda aýylǵa jumys isteýge keletin medısına qyzmetkerine 100 eń tómengi jalaqy mólsherinde birjolǵy aqshalaı tólem tóleý josparlanǵan. Muny bıylǵy eń tómengi jalaqyǵa shaqqanda 9 mln teńgege jeteǵabyl bolady eken. Iаǵnı eń tómengi jalaqy ósse, tólem mólsheri de ósedi. Qalada dárigerlerge múmkindik mol, eńbektense, talpynsa, kóbirek qarajat tabýǵa jol ashyq. Joǵary jalaqy usynatyn jeke klınıkalar bar. Sondyqtan bir rettik tólem naryq zamanynda aýylda eńbek etýdi josparlap júrgen dárigerlerdi yntalandyrýdyń is júzinde tıimdi tetigi bolady dep úmittenemiz. Májilis depýtaty Ashat Aımaǵambetov te qabyldanǵan zańnyń osy tarmaǵyna qatysty pikir bildirip, ún qosqan edi.
«Aýyldaǵy dáriger jetispeýshiligi máselesin sheshýge kelgende «Amanat» partııasynyń bergen ýádesin oryndadyq. Endi aýylǵa baratyn dárigerler 9 mln teńgege jýyq bir rettik kótermeaqy alady. Bul aýyldaǵy dáriger tapshylyǵyn sheshýde mańyzdy ról atqarady.
Munda dárigerlerge qoıylatyn shart bar. Ol sol aýylda kemi 5 jyl jumys isteýi kerek bolady. О́ıtkeni bizde basty másele – aýylǵa myqty mamandardy tartý, yntalandyrý. Negizi qazirdiń ózinde dáriger mamandyq boıynsha 3 jyl jumys isteýi kerek degen talap bar. Endi aýylǵa baryp, bir rettik kótermeaqy alǵan dáriger eńbektenip, sonda ornyǵyp ketedi dep oılaımyz», dedi A.Aımaǵambetov.
Qazir úkimet aýyl medısınasyn josparly damytýǵa kóp kóńil bólip otyr. Memleket basshysy balalar men aýyl turǵyndarynyń arasynda aýrýlardy meılinshe erte anyqtaýǵa kúsh salýdy tapsyrdy. Bir ǵana «Aýyldyq densaýlyq saqtaýdy jańǵyrtý» ulttyq jobasy sheńberinde 2025 jyldyń sońyna deıin 655 medısınalyq-sanıtarlyq alǵashqy kómek obektisi salynyp, 32 zamanaýı kópbeıindi aýdandyq ortalyq aýrýhana uıymdastyrylady eken. Aýyldyq eldi mekenderge barǵan dıplomy bar medısına mamandaryn bekitýdi yntalandyrý maqsatynda ákimdikter áleýmettik qoldaýǵa qarajat bóledi. Rasynda, aýyldaǵy dárigerlerdi áleýmettik qoldaý tetikteri kóp bolǵany durys. Túrli talapqa sáıkes dáriger áleýmettik tólemniń birine ilikpese, ekinshisin paıdalanady.
Zań jobasy aıasynda medısına mamandarynyń balalary balabaqshaǵa qabyldanarda basymdyqqa ıe bolady. Sonymen qatar óziniń mindetin atqaryp júrip, oqystan qaıtys bolǵan mamandardyń balalaryn jáne medısına qyzmetkerleriniń múgedektigi bar balalaryn joǵary oqý ornyna konkýrssyz qabyldaý usynylyp otyr. Sol sekildi medısına qyzmetkerlerine merzimdi áskerı qyzmetti keıinge qaldyrý quqyǵy berledi. Bir sózben aıtqanda, usynylǵan ereje-talaptyń barlyǵy medısına mamandarynyń mártebesin arttyrýǵa, ásirese aýyl medısınasyn órkendetýge negiz bolady dep úmittenemiz.
