Nurzada Amangeldiniń jobasy Inclusion and emprowment atalymy boıynsha usynylǵan 80 jahandyq ınnovasııalyq ónertabystyń ishinen iriktelip tańdaldy. Aqparattyq tehnologııalar fakýlteti Jasandy ıntellekt tehnologııasy kafedrasynyń aǵa oqytýshysy qazaqsha ymdaý tilin tanýdyń qoljetimdi júıesin dúnıejúzilik baıqaýǵa usynǵan. Biregeı ázirleme jasandy ıntellektige negizdelgen ári qymbat sensorlardy, biregeı kameralardy nemese sýperkompıýterlerdi qajet etpeıdi. Qazaq ymdaý tiliniń avtomatty sýrdoaýdarma júıesi estý jáne sóıleý qabileti buzylǵan adamdardyń ómir súrý sapasyn jaqsartýǵa, olardyń bilim alý jáne basqa da úrdisterge kedergisiz enýine baǵyttalǵan.
– Jobamyzdy World Summit Awards sarapshylarynyń maquldaýy ónertabysymyzdyń ınnovasııalyq quramdas bóligine úlken senim bar ekenin kórsetedi. Eger jobamyzǵa halyqaralyq ınvestorlardyń nazaryn aýdara alsaq, onda bul biz úshin úlken jetistik bolady, – deıdi ǵalym.
Nurzada Amangeldi bıyl ulttyq ýnıversıtet jylda taǵaıyndaıtyn Jana asu grantyn ekinshi márte ıelendi. Oqý ordasynyń bul bastamasy ǵylymı qyzmet nátıjelerin kommersııalandyrýǵa qoldaý kórsetýge baǵyttalǵan.
Qazaqstandaǵy World Summit Awards sarapshysy Anatolıı Kremenchýskıı qysqa tizimge 60 elden 136 joba engizilgenin atap ótti.
– 2023 jyly World Summit Awards baıqaýynda elimizden 8 úmitker boldy. Biraq básekelestik joǵary bolǵandyqtan, irikteýden tek bir joba ǵana ótti. Baıqaýdyń aralyq qorytyndysy 8 aqpanda belgili bolady. Kelesi kezekte úmitkerlerdiń qysqa tizimine engen komandalar Chılıge jahandyq kongreske barady. Úmitkerlerdiń árqaısysyna BUU-dan, basqa úkimetterdiń ókilderinen jáne qazylar alqasynyń múshelerinen shamamen 400 adamnan turatyn alań usynylady. Komandalar óz jobalaryn tanystyrady, sodan keıin qazylar alqasy jeńimpazdy anyqtaıdy, – dedi Anatolıı Kremenchýskıı.
Aıta ketý kerek, WSA baıqaýyn Birikken Ulttar Uıymy ótkizedi jáne halyqaralyq sarapshylar jahandyq mańyzy bar eń jaqsy ınnovasııalyq sheshimderdi baǵalaıdy.
