Jaqynda atalǵan bilim ordasynyń 8-synyp oqýshylaryn qutqarýshy kásibiniń qyr-syryna oqytý bastaldy. Qutqarýshy formasyn kıgen oqýshylar ant berip, arnaıy kýálik aldy. Atyraý qalalyq tótenshe jaǵdaılar basqarmasynyń bastyǵy Ǵabıt Babaevtyń aıtýynsha, «Jas qutqarýshy» synyby – oqýshylardy qutqarýshy kásibine baýlýdaǵy alǵashqy qadam. Arnaıy synyp bólmesi qutqarýshylar qoldanylatyn qural-jabdyqtarmen qamtylǵan.
– О́ńirdegi alǵashqy synyptyń Ekinshi dúnıejúzilik soǵystyń erjúrek batyry, áıgili partızan, qazaqtyń qaıtalanbas dańqty perzenti Qasym Qaısenov atyndaǵy mektepte ashylǵany kóńil qýantyp otyr. «Jas qutqarýshy» synybyn ashýdyń birneshe maqsaty bar. Birinshiden, oqýshylardyń qutqarýshy mamandyǵyna qyzyǵýshylyǵyn oıatý. Ekinshiden, qutqarý isiniń negizderin, tótenshe jaǵdaılardy joıý men zardap shekkenderge alǵashqy kómek kórsetýdiń daǵdylary oqytylady. Úshinshiden, oqýshylar arasynda salamatty jáne qaýipsiz ómir salty nasıhattalady, – deıdi Ǵabıt Babaev.
Tótenshelikter jas qutqarýshylarǵa «Alǵashqy kómek kórsetý» taqyrybynda arnaıy dáris ótkizdi. «Jas qutqarýshy» synybynyń oqýshysy Ernar Smadııar bolashaǵyn atalǵan salamen baılanystyrýdy kózdep otyr.
– Kúndelikti tirlikte túrli jaǵdaı kezdesedi. Ásirese, órt, tehnogendik apat bolsa, aldymen qutqarýshylar qolushyn sozady. Bul kásip ıeleriniń jumysy qıyn ekenin bilemin. Biraq tájirıbeni shyńdaý arqyly qıyndyqty eńserýge bolady. Osy mamandyqty tańdaýǵa kóńilim aýyp otyr. Sol sebepti tótenshe jaǵdaılar salasynyń formasyn kıip, «Jas qutqarýshy» kýáligin aldym. Úzdik oqımyn, boks seksııasyna qatysyp júrmin. Bul adamzatty tilsiz jaýdan qutqaratyn bilikti maman bolýyma yqpal etedi, – deıdi «Jas qutqarýshy» Ernar Smadııar.
Atyraý qalalyq tótenshe jaǵdaılar basqarmasynyń bastyǵy Ǵabıt Babaevtyń aıtýyna qaraǵanda, «Jas qutqarýshy» synybynyń oqýshylaryna túrli ekskýrsııa uıymdastyrylady. Sondaı-aq arnaıy sabaqtar ótkizý josparlanǵan.
Atyraý oblysy
