Sýretti túsirgen – Erlan OMAR, «EQ»
Byltyr respýblıkada tótennen kelip, halyqty abdyratqan oqys oqıǵalar az bolmady. Máselen, 2023 jyldyń jazyndaǵy Abaı oblysyndaǵy alapat órtten 60 myń gektar orman alqaby janyp ketti. Osy tusta ár óńirdiń belsendileri bir jaǵadan bas, bir jeńnen qol shyǵaryp, kómegin aıamady. Tótenshe jaǵdaılar departamentterimen yntymaqtastyqta jumys istegen eriktiler qaýipsizdikti qadaǵalap, aımaq turǵyndaryn saqtyqqa shaqyrdy. Apat aıtyp kelmeıdi desek te halqymyz qashanda «Saqtansań – saqtaıdy» deıdi. Sondyqtan jaýapty sala mamandary jan-jaqty qamdanýǵa birtindep kirisken. Jańadan qurylatyn eriktilerdiń mobıldi toby – osynyń aıǵaǵy.
– Tótenshe jaǵdaılardyń aldyn alý jáne olardyń saldaryn joıý salasyndaǵy volonterlik qyzmetti damytý maqsatynda Tótenshe jaǵdaılar mınıstrligi volonterlik uıymdarmen, onyń ishinde Ulttyq volonterlik jelimen belsendi ózara is-qımyl jasaıdy. 2024 jyly Ulttyq volonterlik jelimen birlesip, qanatqaqty joba aıasynda Qostanaı oblysynyń bazasynda tótenshe jaǵdaılarǵa den qoıý salasynda volonterlerdiń mobıldi tobyn qurý josparlanǵan. Osy top úshin TJM kásibı avarııalyq-qutqarý quralymdaryn daıyndaýǵa uqsas dene shynyqtyrý daıarlyǵy boıynsha 10 kúndik daıarlaý jáne normatıvterdi tapsyrý baǵdarlamasy ázirlenedi. Oqytý Qostanaı oblysy TJD bazasynda uıymdastyrylady dep josparlanǵan. Daıarlaý baǵdarlamasy tótenshe jaǵdaılardyń saldaryn joıý maqsatynda volonterlerdiń osyndaı mobıldi toptaryn qurý úshin óńirlerge jiberiledi. Is-shara 2024-2026 jyldarǵa arnalǵan Volonterlikti damytý men qoldaýdyń Jol kartasy aıasynda iske asyrylady dep kózdelip otyr, – dedi Tótenshe jaǵdaılar mınıstrliginiń resmı ókili Janna Dáýrenbekova.
Búginde elimizdegi 136 volonterlik uıym, onyń ishinde 47 myńnan asa volonter Tótenshe jaǵdaılar mınıstrligi qurylymdarymen birlese jumys isteıdi. Olar turaqty daıyndyqtan da ótip otyrady. Keıingi úsh jyldy esepke alsaq, 3,5 myńnan asa qoǵam belsendisi salaǵa qatysty vedomstvolarda oqys oqıǵa kezindegi qarym-qabileti men bilim-biligin shyńdaǵan.
– Tótenshe jaǵdaılar mınıstrligi úkimettik emes uıymdarmen birlese birneshe baǵyt boıynsha jumysty uıymdastyrady. Atap aıtqanda, tabıǵı apattardan zardap shekken adamdarǵa kómek kórsetýge qatysý, gýmanıtarlyq kómek kórsetý. Ekinshiden, tótenshe jaǵdaılardyń aldyn alýǵa jáne olardyń saldaryn joıýǵa qatysý. Úshinshiden, joǵalǵan adamdardy izdeý boıynsha izdeý-qutqarý jumystaryna qatysý, – dedi baspasóz hatshysy.
Volonterler – eldiń uıymshyldyǵy men birligin qajet etetin is-sharalardan tys qalmaıtyn jandar. Kúni búginge deıin osy janashyrlar órttiń, gazdyń shyǵýynyń aldyn alý, sý aıdyndaryndaǵy qaýipsizdikti saqtaý baǵytyndaǵy túrli jıynǵa belsene qatysqan. О́tken jyldyń ózinde 1 700-den astam profılaktıkalyq is-sharada boı kórsetken.
Qazirgi tańda byltyr eriktilerdiń halyqaralyq forýmnyń qorytyndysy boıynsha mınıstrlik tótenshe jaǵdaılardyń saldaryn joıý kezeńinde volonterlerdiń qaýipsizdigin qamtamasyz etý úshin memlekettik organdarmen jáne volonterlik uıymdarmen birlesip, oqys oqıǵalardyń aldyn alý jáne olardyń zardabymen kúresý jolyna volonterlerdi tartý algorıtmi jan-jaqty talqylanyp, ázirlenip jatyr.
