"Astana" telearnasynyń jazýynsha, olar sasyq sýdyń ústinde otyrǵanyn aıtyp talaı márte shaǵymdanǵan. Munda káriz júıesi múldem joq. Jer asty sýy kóterilip, aýla túgili, edenniń astyna tirelip tur.
- Jer berilgende búkil ınfraqurylymmen birge svet, sý, gaz, telefon bárin qosty ǵoı. Jol qosý kerek da. Adamǵa ómir súrýge jaǵdaı jasaý kerek. Solaı ma? Sýdyń kirisin jasady, nege halyq shyǵysyn 2030 jylǵa deıin kútý kerek? Halyq óz kúshimen myna sýdy túsire almaıdy ǵoı. Qansha tartyrsa da bizdiń álimiz kelmeıdi. Sondyqtan ChS jarııalaýdy talap etip taǵy shyqtyq, – deıdi qala turǵyny Aıgúl Dosqalıeva.
Jerasty sýynyń kóterilýine turǵyn úıler aýlasyndaǵy túbi tesik septıkter de áser etip tur. Káriz júıesi bolmaǵan soń turǵyndar sondaı aılaǵa barǵan. Mamandar búginde qaýip tóngen aýmaqtyń kólemi 21 gektardan asqanyn aıtady. Onda 200-den astam jer telimi bar. Qala bıligi mamandarmen aqyldasyp, tájirıbe retinde 4 metrlik tereńdikke súzgi ornatqan. Bul qurylǵy táýligine 100 tonnadaı jerasty sýyn shyǵaryp jatyr.
- Ýaqytsha bolsa da bul jumysty shuǵyl túrde jasap jatyrmyz. Ári qaraı bizde búgingi kúni jobalyq-smetalyq qujattama jasaqtalýda. Káriz júıelerin júrgizý buıyrsa, maýsym-shilde aıynda memelekettik saraptamadan shyǵý kútilýde. Merdigerler aıaqtalǵannan keıin. Sodan keıin sol jumystar aqsha bólinip bastalatyn bolady, – dedi qala ákiminiń orynbasary Erbolat Omarov.
Sheneýnikterdiń ózi bul jobaǵa qansha qarjy ketetinin dóp basyp aıta almaı otyr. Nátıjesine de senimsiz. Al gıdrogeologtar kárizben birge drenaj júıesi úzdiksiz jumys istemeıinshe, máseleni sheshý múmkin emestigin aıtady.
- Drenaj júıesin salmadyq dedik. Turǵyndar ne isteıdi? Olar septıkti drenaj qudyǵy qylyp, sýdyń deńgeıin túsirý úshin sonyń sýyn aparyp, kanalızasııaǵa qosyp. Anaý ashy sý. Iаǵnı, sý tazartý qondyrǵysyna qoıǵan bir maqsatymyz oryndalmaıdy, – deıdi gıdrogeolog Edige Sabýrov.
