foto: EUÝ baspasóz qyzmeti
«Rixos President Astana» qonaq úıinde EUÝ kafedrasynyń ekinshi fılıaly ashyldy. Onda Eýrazııa ulttyq ýnıversıtetiniń áleýmettanýshylary bıznes úshin zertteýler júrgizedi, birlesken ǵylymı jobalar jasaıdy, sondaı-aq bilim alýshylarǵa tájirıbelik jáne teorııalyq dárister ótkiziledi.
«Bıznestiń bilim men ǵylymǵa degen qyzyǵýshylyǵy artyp keledi. Seriktesterimizdiń bastamasymen uıymdastyrylǵan kafedra fılıalynyń ashylýy osyny dáleldeıdi. Birneshe jyl buryn «Rixos President Astana» qonaq úıinde ýnıversıtetimizdiń «Týrızm» kafedrasy fılıaly iske qosyldy. Búgingi tańda kóptegen stýdentterimiz «Rixos» qonaq úılerinde tájirıbeden ótýde, al úzdik túlekter qonaq úı bıznesinde basshylyq qyzmet atqarady. Osylaısha biz jumys berýshilermen tyǵyz yntymaqtastyq ornatamyz. Búgingi tańda elimizdiń túkpir-túkpirindegi óndiristik ortalyqtarda EUÝ kafedralarynyń 74 fılıaly jumys isteıdi», dedi L.N.Gýmılev atyndaǵy EUÝ rektory Erlan Sydyqov.
EUÝ kafedrasy fılıalynyń ashylý saltanatyna ýnıversıtet pen qonaq úı ókilderi, jas ǵalymdar, oqytýshylar men stýdentter qatysty. О́z kezeginde «Rixos President Astana» bas menedjeri Tansel Terdjan qonaqjaılyq ındýstrııasyn damytýdyń mańyzdylyǵyna toqtaldy.
«Qonaqjaılylyq ındýstrııasy adam resýrstarymen qamtamasyz etilýi kerek. Qazir «human to human» qyzmeti búkil álemde mańyzdy. Men osy saladaǵy birneshe máseleni anyqtadym. Sondyqtan biz EUÝ-men yntymaqtastyqty 2017 jyly bastadyq. Osy ýaqyt ishinde bizdiń seriktestigimiz nyǵaıa tústi. «Rixos» qonaq úıler jelisinde EUÝ stýdentteri ózderin erkin, óz ýnıversıtetinde júrgendeı sezinedi. Biz ózara tıimdi yntymaqtastyq ornattyq jáne ortaq maqsat – el ekonomıkasy úshin kásibı kadrlardy daıarlaý», dedi ol.
Áleýmettik ǵylymdar fakýltetiniń doktoranty Juldyz Kárim kafedra fılıaly doktoranttardyń akademııalyq daǵdylaryn shyńdaýǵa kómektesetin jáne ǵylymı ósý úshin jańa múmkindikter beretin alańǵa aınalatynyn atap ótti.
«Kafedramyzdyń taǵy bir fılıaly ashylyp, doktoranttardyń bilimin, kásibı jáne akademııalyq biliktiligin arttyrýǵa múmkindik artty. Bul bastama sheteldik áriptesterimizben jáne ǵylymı-zertteý keńistigimizben yntymaqtastyqty arttyrýǵa kómektesedi», deıdi jas ǵalym.
Aıta keteıik, EUÝ-dyń Áleýmettik ǵylymdar fakýltetinde eki myńnan astam stýdent bilim alyp jatyr.
