1883 jyly Parıjdegi Varete teatry sahnasynda tusaýy kesilgen qoıylym elordalyq teatrda komedııaǵa qurylǵan.
«Mademýazel Nıtýsh» – máńgilik mahabbat tarıhy. Spektakl óz kórermenderiniń yqylasyn tez baýrady. Quddy mahabbat ertegisindegi beınelerdi kóz aldymyzǵa keltirgendeı. Qoıylymnyń mýzykalyq árleýi men ártisterdiń oıyn-saýyq óneri de erekshe. Sondaı-aq fransýz kıim-úlgisine qazaqy oıý-órnekti sabaqtastyra otyryp, eki mádenıetti baılanystyra alǵan. Osy oraıda kostıýmder boıynsha sýretshiniń bıik talǵamyn baıqaýǵa bolady. Odan bólek spektakldegi náziktikti aıryqsha atap ótemiz. Florın Erveniń mýzykaǵa degen shynaıy mahabbatyn rejısser Alýa Sabo kórkem sahnalaı alǵany da kórinip tur.
Qoıylymdaǵy asa náziktik pen sulýlyq boıyna tán arý Denızeniń rólin aktrısa Inabat Rızabekqyzy oınasa, onyń ǵashyǵy Leıtenant Shamplatrony Igilik Orazauly somdady. Al mýzykany ómiriniń máni etip, tipti júrekten shyǵatyn óneri úshin, basyn táýekelge tikken basty keıipker Flarıdordyń rólin akter Ernar Mahambet alyp shyqty. Asa eptilik pen energııany boılaryna jııa bilgen jas ártisterimizdiń talanty sharyqtap keledi. Fransýz klassıkasynyń kórkemdigi teatr sahnasynyń ajaryn asha aldy. Al ony laıyqty túrde baǵalaı bilgen qaýymnyń qoshemeti men yqylasy teatrǵa úlken serpin ákelgendeı.
Dıdar ASYLHAN,
Qoja Ahmet Iаsaýı atyndaǵy Halyqaralyq qazaq-túrik ýnıversıtetiniń 2-kýrs stýdenti
