Kórikti Kókshetaý

Áýeli Kóksheniń kórkem beı­nesin kesteleıtin «Kókshetaý» poezııa­lyq kompozısııasy kórermen nazaryna usynyldy. Kóz jaýyn alatyn jaquttaı jarqyraǵan sulýlyq, kıeli tabıǵattyń qasterli beınesi kórermen kóńilin jaýlap, kókiregindegi maqtanysh sezimin oıatty. Ile Dına Ormanshına jetekshilik etetin «Asyl mura» halyqtyq bı ansambli kórkemdegen Sáken Seı­fýllınniń «Arqanyń kerbez sulý Kókshetaýy» oryndaldy. Án jaýhary jer shoqtyǵy Kókshetaýdyń bar qasıetin beınelep, kórikti etip jet­kizdi. Áldılegen áýeni qandaı. Ilkidegi talassyz daryndardyń laıyqty izbasary, kókshelik kompozıtor Iran sal Tasqaranyń «Kókshetaý valsin» tyńdarman qaýym súısine tyńdady. QR eńbek sińirgen ártisi Bısara Máskenova, QR mádenıet salasynyń úzdigi, dástúrli ánshi Ken­jebaı Muqyshev, halyqaralyq, res­pýblıkalyq baıqaýlardyń laýreattary Azamat Qabdyl men Ádil Qu­saıynovtar Úkili Ybyraı men Aqan seriniń ánderin tamyljyta oryndady.

Kesh barysynda búgingi ónerpaz­dardyń da shyǵarmalary oryndalyp, tusaýy kesildi. Máselen, «Sal Kókshe» áni. Ánniń sózin belgili aqyn Qýanysh Ospan jazsa, ánin Marǵulan Ospanov shyǵarǵan. Sondaı-aq Qarataı Báıkenovtiń sózine jazylǵan Esimjan Japa­rov­tyń «Kókshem meniń» áni de kóp­­shilik kóńilinen shyqty. Belgili aqyn Tólegen Qajybaevtyń sózine ja­zyl­ǵan kompozıtor Qurmet Sa­qaı­dyń «Kókshetaý valsi» shuraıly shyǵarmalardyń biri boldy.

Bul ejelden án áýelep, óleń qon­ǵan ólkede týǵan jerdiń márte­besin bıik­tetip, qadir-qasıetin keıingi urpaqtyń kókiregine quıyp, súıegine sińiretin ádemi kesh boldy.

Kókshetaý qalasy