Belsendilik

Men qazaqtyń mańdaıyna bitken birden-bir tól janýary – jylqymyn. Olaı deıtinim, qazekeń ulan-ǵaıyr dalada órip júrgen jan-janýar ishinen bizdi tańdap qolǵa úıretkenine baqandaı bes myń jyldyń júzi bolypty. Biz – qazekeńniń minse kóligi, saýsa sýsyny, jese tamaǵymyz. Iаǵnı taǵdyr-talaıymyz bite qaınasyp, birimizsiz birimizdiń kúnimiz joq qalypqa jetkenbiz.

Basymyzdan baqaıshyǵymyzǵa deıin baǵam­dap, jeldeı jeldirtip qurmet tutyp, biz jó­ninde nebir óleń-dastandar týdyryp qadir-qasıetimizdi asqaqtatqanyna rızamyz.

Endi, mine, zaman ózgerip, tehnıkanyń dáýiri dúrildegeli beri biz qaǵajý qalyp, qapalana bastaǵaly da biraz bolǵan.

Qyjyl qoıyrtpaqtalyp ishten tynyp, typyrshyp júr edik, Qudaı ońdap, elimizge álemniń túkpir-túkpirindegi jan-janýar ókilderi jınalyp, alqaly basqosý ótkize qalmasy bar ma.

Buıyryp, alqaly top aldynda sóz sóıleý mártebesine ıe boldyq.

Ne kerek, shekteýli ýaqytta shermende sherimdi aǵyl-tegil aǵyttym... Sondaǵy aıǵyrlyǵyma basyp kisinep alyp aıtqa­nymnyń toqeteri mynaý boldy:

– Aǵaıyndar, osy otyrǵandardyń birazy bir zamandarda osy ólkeni meken etkenderińdi esterińe salaıyn. Qıyn-qystaý zaman týyp, tabıǵat osy ólkede alaı-dúleı bolǵanda árkim bas saýǵalap tym-tyraqaı qasha jónel­genderińdi bilemiz. Bir-ekeýin aıtsam, máselen, jan-janýardyń alyby – pildiń ózi úrim-butaǵyn úıirip, bir-aq túnde Úndistannan bir-aq shyqty... Ásheıinde aqyryp-baqyryp aıbat sheger arys­tan tuqymynyń qaıda baryp bas saýǵalaǵanyn bilemiz? Azýy alty qarys aıýeke sizdiń sonaý soltústikke súńgip ketkenińizdi qalaı umy­tamyz? Oıpyraı, qurt-qumyrsqa, jer baýyrlap jyljyǵan jándik ataýly ońtústikke opyryla kóshkendegi kórinis áli kúnge kóz aldymdyzda. Túıe jaryqtyq ta mań-mań basyp qıyr shetke qyrqa asyp kete bardy-aý...

Qaısybirin aıtaıyq, osy otyrǵan­daryńnyń kóbińniń bir kezderdegi jurtyń osy eldi meken bolǵan. Oǵan topan sý qapta­ǵandaǵy Nuh paıǵambardyń kemesi kýá.

Endi, mine, elimiz táýelsizdik alyp, Alla Taǵala buıyrtqan baılyǵymyzdy meńgerip asyp-tası bastaǵanda: «Qazaqstannyń asty-ústi tolǵan baılyq, qut-berekeli eldi meken», dep neshe túrli aıla-sharǵyny oılastyryp kelip qalǵan ekensizder», dep jylqy emespiz be, qulaǵymyzdy qaıshylap, oń tuıaǵymmen jer tarpı naǵyz «kisineı» sóıleýge bet buryp: «Osy eldiń etene janýary bizdiń de qadir-qasıetimiz qalmady. Máselen, qazy-qartany – evreıler, qymyzdy – nemister, eń aıaǵy kókpardy kórshi el zańdy túrde ıelenip aldy», dep tótesinen tartyp edim, jınalystyń tizginin ustap otyrǵan ózimizdiń bılik ókilderi: «Ýaqytyńyz bitti», dep short kesip, oǵan kelip otyrǵandar qol soǵa qosarlanyp minberden ıt qosyp qýyp túsirdi.

Ne isteıin, túsken boıda syrtqa shyǵyp bar daýsymmen kisinep, jer tarpı aldyńǵy aıaǵym­dy kókke kótere bulqynyp baryp bar ekpinimmen shaba jóneldim.

Qansha shapqanym belgisiz, aıaq talyp, tizem dirildep, omaqasa qulappyn.

Ertesinde es jısam, bir top «arnaıy» ókil kelip aıaǵymdy matap, borbaıymdy shu­qylap jatqan. Sóıtsem, pátshaǵarlar sáýirik ýaqyty bitti dep pishtirip tas­tapty...