Bir jyldyń qorytyndysy boıynsha 17 oblys pen 3 qalanyń arasynan Túrkistan oblysy úzdik atandy. Ońtústiktiń sportshylary byltyrǵy jarystarda jalpy sany 58 altyn, 52 kúmis, 65 qola júldemen kósh bastady. Onyń 13 altynyn túrkistandyqtar qazaq kúresinen enshilep, rekordtyq kórsetkishti tirkedi. О́ńir ókilderi ulttyq sporttyń damýyn júıeli jolǵa qoıǵan.
«Búgingi tańda Túrkistan oblysynda 7 oblystyq, 23 aýdandyq, 7 qalalyq sport mekemesinde ulttyq sport túrlerinen bólimsheler jumys isteıdi. Sonymen qatar oblystyq deneshynyqtyrý jáne sport basqarmasy sport mektepterindegi reglamenttiń saqtalýyn qadaǵalap, jattyqtyrýshylar men ádiskerlerge oqý-jattyǵý sabaqtaryna árdaıym ádistemelik kómek kórsetedi. О́tken jyly ulttyq sport túrlerinen jarys erejelerine ózgerister men tolyqtyrýlar engizildi. Atap aıtqanda, aýdaryspaqtan buryn 8 salmaq dárejesinde jarys ótse, bıyl 9 salmaq dárejesinde baq synasty. Sondaı-aq teńge ilý jáne jamby atý sportynan buryn 3 stıl boıynsha 1 ǵana sportshy qatysatyn, bıyl 3 stılge 3 sportshy qatysa alatyn múmkindik týdy. Qatysýshylar sany kóbeıdi. Nátıjesinde, sportshylarymyz tamasha óner kórsetip, elimizdegi ulttyq sport túrlerinen eń úzdik óńir ekenin dáleldep, jalpykomandalyq esepte 1-oryndy ıelendi», dedi Túrkistan oblystyq deneshynyqtyrý jáne sport basqarmasynyń basshysy Qanat Joldyqarev.
Ulttyq jáne at sporty túrleri ortalyǵy baspasóz qyzmetiniń habarlaýynsha, reıtıngte ekinshi oryndy Astana qalasy ıelendi. Elordalyqtar atalǵan jarystardan 24 altyn, 19 kúmis, 28 qola júlde enshiledi. Ásirese astanalyq dástúrli sadaq atýshylar aldyna jan salmady. Al úzdik úshtikti Shymkent qalasynyń sportshylary túıindedi. Megapolıs namysyn qorǵaǵan oǵlandar 24 altyn,19 kúmis, 20 qola jeńip alǵan. Shymqalada da qazaq kúresiniń bási joǵary. 24 altynnyń 11-i qazaq kúresiniń balýandaryna tıesili. О́kinishke qaraı, ulttyq sportty áli de damytýdy qajet etetin aımaqtar bar. Ásirese Qostanaı, Ulytaý, Shyǵys Qazaqstan oblystarynyń nátıjeleri tómen.
«Keıingi jyldary elimizde ulttyq sport qarqyndy damyp keledi. Onyń dáleli 2023 jyldyń ózinde bizdiń sportshylar halyqaralyq arenalardaǵy jarystardan 35 altyn oljalady. Qazir ortalyqqa qaraıtyn 11 sport túri bar. Árqaısysynyń damýy júıeli jolǵa qoıylǵan. Sonymen qatar olardy zamanaýı talaptarǵa saı qylý maqsatynda sońǵy úlgidegi tehnologııalardy da qosyp jatyrmyz. Biz jyl saıyn ulttyq sporttaǵy úzdik óńirlerdi anyqtap otyramyz. О́zderińiz biletindeı, bul jaǵynan elimizdiń ońtústik aımaǵy alda tur. Ásirese Túrkistan oblysy ózgelerden kósh ilgeri. Munyń barlyǵy – aımaqtaǵy sportqa jaýapty mamandardyń, sport basqarmasynyń júıeli jumysynyń arqasy. Sonymen qatar Astana qalasy qarqyndy damýdyń jolyna túsken. Bul óńirde asyq atý, toǵyzqumalaq, dástúrli sadaq atý, qusbegilik jáne qazaq kúresiniń ókilderi alda keledi. Degenmen at sportyna qatysty máseleler bar. Bul aldaǵy ýaqyttyń enshisinde sheshiletin dúnıe dep esepteımin. Buıyrsa, barlyq nátıjeniń qorytyndysyn bıyl ótetin Dúnıejúzilik kóshpeliler oınynda kóremiz», deıdi Ulttyq jáne at sporty túrleri ortalyǵynyń dırektory Baqdáýlet Sábıtov.
Sóıtip, ulttyq sporttyń josparlanǵan sharalary tolyǵymen aıaqtaldy. Endi bıyl ár sport túrinen ishki birinshilikter uıymdastyrylady. Sonymen qatar ulttyq qurama músheleri halyqaralyq jarystarǵa qatysyp, el namysyn qorǵaıdy. Al eń basty maqsatymyz – qyrkúıek aıynda ótetin Dúnıejúzilik kóshpeliler oıyndarynda barynsha tabysty óner kórsetip, barsha qazaq jurtyn jarqyn jeńisterimizben qýantý.
