Bul qujatta otandastarymyzdyń ómir súrý deńgeıi men ál-aýqatyn arttyrý maqsatynda taraptardyń ózara tyǵyz is-qımyly qarastyrylǵan. Birlesken kúsh-jiger ekonomıkany aýqymdy jáne tereń transformasııalaý, ınvestısııalardy ulǵaıtý jáne ınflıasııa boıynsha maqsatty kórsetkishterdi oryndaý arqyly sapaly ekonomıkalyq ósýge qol jetkizýge baǵyttalady.
«Úkimet óz mindeti retinde ortamerzimdi perspektıvada ekonomıkanyń ósý qarqynyn 6%-ǵa deıin jetkizýdi kózdep otyr. Ulttyq bank maqsaty – ınflıasııalyq targetteý rejiminde ortamerzimdi perspektıvada ınflıasııany shamamen 5% tóńireginde turaqtandyrý», delingen kelisim mátininde.
Atap aıtqanda, Úkimet turaqty ekonomıkalyq ósý úshin teńgerimdi salyq-bıýdjet saıasatyn júrgizetin bolady, bıýdjet shyǵystarynyń munaı baǵasyna táýeldiligin tómendetý, sondaı-aq olardyń tıimdiligin arttyrý boıynsha sharalar qabyldaıdy. Sonymen qatar kásipkerlik qyzmet pen ınvestısııa tartýda belsendilikti arttyrý úshin qolaıly jáne yntalandyrýshy jaǵdaılar jasaý boıynsha qadamdar qarastyrylady.
Azyq-túlik ónimderin tutynýdaǵy ımport úlesin qysqartý, onyń ishinde jańa qus jáne et kombınattaryn, sút zaýyttaryn iske qosý, alma baqtaryn ósirý arqyly eldiń azyq-túlik qaýipsizdigin qamtamasyz etý boıynsha jumys jalǵasady.
Sonymen qatar áleýmettik mańyzy bar azyq-túlik taýarlarynyń aýylsharýashylyq taýar óndirýshilerden tutynýshyǵa deıingi qozǵalysyn sıfrlandyrýǵa múmkindik beretin ónimdi qadaǵalaýdyń Ulttyq júıesi iske qosylady.
Úkimet syrtqy syn-qaterlerdiń Qazaqstan ekonomıkasyna teris áserin barynsha azaıtý úshin syrtqy taýar aınalymyn, saýda sharttaryn jáne táýekelderdi baqylaýdy jalǵastyrady.
Sondaı-aq qujatta ınnovasııalyq jáne básekege qabiletti ortany damytý, kóleńkeli sektordy azaıtý, memlekettiń ekonomıkaǵa qatysýyn azaıtý, tutynýshylardyń quqyqtaryn qorǵaý jáne t.b. máseleler boıynsha jumystardy ári qaraı jalǵastyrý qarastyrylǵan.
Kelisimde taraptar Qazaqstanda ınstıtýsıonaldyq reformalardy júrgizýdiń, ınstıtýttardyń táýelsizdigin nyǵaıtýdyń, quqyqtyq bazany kúsheıtýdiń jáne respýblıkanyń ınstıtýsıonaldyq standarttaryn ozyq úlgige jetkizýdiń mańyzdylyǵyn aıqyn atap ótken.
