Táńirtaýdyń týmasy Aımeken kishkentaıynan maldyń bir shetinde júrýdi ádetke aınaldyrǵan eken. Ákesi Erbolattyń erke qyzy óte ójet. Ala jazdaı ataqty Shálkóde jaılaýynyń baýraıynda mal baǵatyn ata-anasynyń janynan bir eli alystamaıtyn balanyń malǵa degen yqylasy erekshe. Sondyqtan bolar irili-usaqty maldy jazbaı tanýǵa beıim.
Búginde Talǵar qalasyndaǵy S.Seıfýllın atyndaǵy №2 orta mekteptiń 3-synybynda oqıtyn Aımeken Áýelhan qysqy demalysta ózi týyp-ósken Qoshqar aýylyna baryp, enshisindegi eki-úsh jabaǵynyń jalyna jarmasa jýasytqan erligi jurtty súısintti. Onyń asaýdy aýyzdyqtap, taqymdaýǵa qumarlyǵy eseıgen saıyn eselene túsýde. Sóıtip, at jalynda oınaıtyn baldyrǵan batyldyǵymen daralanyp keledi.
«Bes jasynan ákesine ilesip, kókparǵa baratyn. Sodan beri atqa qumar. Jylqyǵa erekshe ańsary aýyp turady. Qyz bala bolǵan soń ýaıymdaıtynym bar. Ondaıda «áje, men batyrmyn, qoryqpa» dep ózimdi qaırap qoıady. Til-kózden saqtap, aman júrsinshi», dep 80-nen asqan Bátıhan ájesi tileýin tileýde.
Atqumar Aımekenniń sýret salýǵa, óleń oqýǵa da jaqyndyǵy joq emes. Muqaǵalı atasynyń biraz shýmaqtaryn jattap alǵan. Ashyq ta jaıdary minezimen kópshilikti baýrap alatyn qylyǵy súısintpeı qoımaıdy. Qysy-jazy úı men túzdiń sharýasyn shalqytyp júrgen anasynyń da qolqanaty bola bastaǵan baldyrǵannyń bolashaǵynan zor úmit kútýge bolady. «Bolam degen balanyń betin qaqpa, belin bý» dep beker aıtpaǵan ǵoı. Aýyzdyqpen alysqan asaýdy tizgindegen Aımekendi osy jastan at sportyna baýlıtyn bolsa juldyzy jarqyraǵan sportshy shyǵaryna senim mol.
Almaty oblysy
