Kórermender nazary 76 kg salmaq dárejesine aýdy. Sebebi bul salmaqta Rıo Olımpıadasy men Djakartadaǵy Azııa oıyndarynyń qola júldegeri, Azııa chempıonatynda jeti ret (2 altyn, 2 kúmis, 3 qola) jeńis tuǵyryna kóterilgen qaraǵandylyq Elmıra Syzdyqova men astanalyq Jámıla Baqbergenova kúresti. Dál búgin, ıaǵnı 5 aqpanda Elmıra 32 jasqa toldy. Desek te onyń qarsylasy da osal emes edi. Osydan týra bir aı buryn 28 jasqa tolǵan Jámıla – álem chempıonatynyń eki dúrkin kúmis jáne bir márte qola júldegeri, Azııanyń úsh dúrkin chempıony jáne eki márte júldegeri. Desek te ol bul ataqtyń barlyǵyna 72 kg salmaq dárejesinde óner kórsetken kezderi qol jetkizdi. Al Baqbergenovanyń túpki maqsaty – Olımpııa oıyndarynda atoı salý. Sol sebepti de oǵan dereý salmaǵyn aýystyrýǵa týra keldi.
Asa aýyr salmaqtaǵy qatysýshylar sanynyń azdyǵynan jarys aınalmaly júıe boıynsha ótti. Alǵashynda ekeýi ekinshi kezeńde kezdesip, asa shıelenisti báseke 5:3 esebimen Syzdyqovanyń paıdasyna sheshildi. Bul jaǵdaı Jámılany jasytqan joq. Kersinshe, jigerlendire tústi. Odan keıin ózge balýandary sypyra utqan ol aqtyq saıysta syralǵy qarsylasymen qaıta jolyqty. Bul joly Baqbergenovanyń baǵy jandy. Báseke barysynda utylyp jatqanyna qaramastan ol sońyna deıin aıanbaı aıqasty. Aqyry ońtaıly tusta Elmırany keýdesinen asyra laqtyrdy. Tóreshi Jámılanyń bul ádisin tórt upaımen baǵalady. Osylaısha, chempıondyq ataq elordalyq arýǵa buıyrdy. Elmıra kúmis júldeni qanaǵat tutty. Qola medaldi Gúlmaral Erkebaeva enshiledi.
68 kg salmaqta kúsh synasqan Jámılanyń syńary Azııa chempıony Mádına Baqbergenova aqtyq synǵa deıin alqynbaı jetkenimen, fınalda kópti kórgen 37 jastaǵy shymkenttik sportshy Elena Shalygınamen beldesti. Onyń Beıjiń Olımpıadasy (1 qola), álem chempıonaty (1 kúmis, 2 qola), Azııa oıyndary (1 altyn), qurlyq birinshiligi (2 altyn, 2 kúmis, 2 qola) jáne Islam yntymaqtastyǵy oıyndarynda (1 altyn) atoı salǵanyn jankúıerler jaqsy biledi. Mádına Elenany eńsere almady.
О́zge salmaq dárejelerinde myna balýandar altynnan alqa taqty: 50 kg – Laýra Ǵanıqyzy (Almaty qalasy), 53 kg – Juldyz Eshimova (Astana), 55 kg – Zúlfııa Iаhıarova (Qaraǵandy), 57 kg – Emma Tısına (Astana), 59 kg – Dıana Kaıýmova (Astana), 62 kg – Irına Kýznesova (Akmola), 65 kg – Irına Kazıýlına (Abaı) jáne 72 kg – Anastasııa Panasovıch (BQO).
