Infografıkany jasaǵan – Záýresh SMAǴUL, «EQ»
Bul – alańdatarlyqtaı derek. Árıne, polısııa qyzmetkerleri kólik rýlindegi shopyrlarǵa qaýipsizdik erejesin saqtaýdy udaıy eskertip keledi. Biraq tártip saqshylarynyń keńesine qulaq aspaı, júre tyńdaǵan júrgizýshiler jol apatyna ushyrap jatyr. Sóıtip, ózderi de, kóliktegi ózge jolaýshylardyń qaza tabýyna sebepker bolǵanyna birneshe derek bar.
Jergilikti polısııa qyzmeti basqarmasy basshysynyń orynbasary Nurbolat Álekesovtiń málimetine súıensek, jol-kólik oqıǵalarynyń basym bóligi respýblıkalyq mańyzy bar tasjolda bolatyny anyqtalyp otyr. Mundaı jolda adam óliminiń 61,8 paıyzy tirkeledi eken. Statıstıkalyq taldaýǵa sáıkes óńirdegi respýblıkalyq sanattaǵy jolda tirkelgen kólik apatynan 55 adam qaza bolǵan.
Sondaı-aq jasóspirimder zardap shekken jol-kólik oqıǵasynyń sany edáýir ósken. Sol sebepten jol apatynyń aldyn alý úshin 14 márte jedel aldyn alý is-sharasy men reıdtik aksııa ótkizilipti. Alaıda jol-kólik oqıǵasy azaıar emes. Jol apatynyń jıilegenine alańdaǵan oqýshylar kólik júrgizýshilerge arnalǵan hat joldady.
«Qymbatty júrgizýshi aǵaı, qoǵamdyq kóliktiń qyzmetin kúndelikti paıdalanamyz. Avtobýspen úlkender jumysqa, biz sabaqqa baramyz. Bárimiz úıge qaıtarda avtobýsqa minemiz. Kólikti abaılap júrgizseńiz, barlyǵymyz aman bolamyz. Apattan saq bolý – óz qolyńyzda! Saparyńyz sátti bolǵaı!», dep jazypty oqýshynyń biri.
Polısııanyń deregine júginsek, byltyr jol apatynan bir otbasynyń 6 adamy mert bolǵan edi. Onyń tórteýi – on ekide bir gúli ashylmaǵan beıkúná sábı. Al taǵy bir kólikte 7 adam baqılyq boldy. Estigen adamnyń janyn túrshiktiretin mundaı derekter sol mezette áleýmettik jeli arqyly kópshilikke tarap jatyr. «El qulaǵy – elý» degendeı, jol apaty týraly derekti estip, tipti beınejazbasyn smartfonnan kórse de, kúre jolda jelik qýǵandaı eliretin júrgizýshiler azaıar emes.
Keıde polısııa qyzmetkerlerin oq atýǵa májbúr etetin júrgizýshiler bar. Máselen, ótken jylǵy qarashada «Dalmlerchr Sler» júk kóliginiń shopyry ınspektordyń aıaǵyn basyp ketti. Polısııa qyzmetkerleri ony toqtatý úshin aspanǵa, keıin kólik dóńgelegine eki retten oq atty. О́ıtkeni kólik júrgizýshisi jergilikti ýaqytpen saǵat 11:45 shamasynda «Atyraý-Oral» tasjolynyń 183-shaqyrymy tusynda jyldamdyqty shamadan tys asyrǵan. Alaıda kólik júrgizýshisi patrýldik polısııa ınspektorlarynyń zańdy talabyna baǵynbaı, qasha jónelgen. Tártip saqshylary Inderbor kentinde qyzmettik kóliktermen aldyn bógep, toqtatqan edi. Júk kóligi toqtatylǵanymen, júrgizýshi kabınadan túspesten qashyp qutylýǵa tyrysty. Sol kezde patrýldik polısııa ınspektorynyń oń aıaǵyn basyp ketip, jol boıyndaǵy birneshe avtokólikke apatty jaǵdaı týdyrdy.
Árıne, zańdy talapqa baǵynbaǵan, tipti polısııanyń aıaǵyn basqan júrgizýshi qutylǵan joq. Onyń kóligi toqtatyldy, ózi ustaldy. Biraq tańdanys týdyratyn eki jaıt bar. Birinshisi – onyń mas emestigi. Ekinshisi – kóliktiń óziniki emestigin aıtyp, bas tartýy.
Jol-kólik oqıǵalary bıyl da qaıtalanyp jatyr. Máselen, jyl bastalǵaly beri 15 jol-kólik oqıǵasy tirkelgen. Apat saldarynan 6 adam qaza taýyp, 14 adam dene jaraqatyn alǵan.
Polıseılerdiń pikirinshe, jol apatynyń birneshe sebebi bar. Birinshiden, aldaǵy kólikti basyp ozý talaby buzylady. Ekinshiden, jyldamdyqty shamadan tys arttyrýmen baılanysty bolyp otyr. О́kinishke qaraı, jolda júrý erejesi saqtalmaıdy. Munyń bárine aldymen rýldegi júrgizýshi kináli ekeni daýsyz. О́ıtkeni kólik júrgizgender jaýapkershilikti sezinbeı, jelik qýǵandaı asyǵady. Sóıtip, «Asyqqan – shaıtannyń isi» degen támsildi esten shyǵarady.
«Patrýldik polısııa qyzmetkerleri respýblıkalyq mańyzy bar avtomobıl joldaryn táýlik boıy qadaǵalaıdy. Qaýipsizdikti saqtaý úshin 15 baqylaý-ótkizý beketinde kólik júrgizýshilerine yqtımal apattar týraly eskertedi. Jaqynda polıseılerge «Cyber Sheriff» mobıldi apparaty bar 28 kólik, 4 áýe drony, 8 «Orakýl-Insaıt» mobıldi-tasymalaý jáne «Trafık-Skaner» stasıonarlyq jyldamdyq ólshegish qurylǵysy berildi. Qazir tasjoldarda jyldamdyqty ólsheıtin qurylǵylardy ornatý jumystary júrgizilip jatyr», deıdi N.Álekesov.
Atyraý oblysy
