Dara darynnyń esimi jańǵyrdy

Dástúrli ánshi retinde ǵana emes, opera arqyly da óner keńistiginen aıshyqty oryn alǵan Ǵarıfolla murasy, ta­lanttyń jan júreginen týǵan kóptegen mýzykalyq shy­­ǵar­ma – halyqtyq maz­mun­ǵa baı, keń tynysty dúnıe­ler. Ásem án áýelegen taǵ­zym keshine arnaıy kelgen Sáý­le Janpeıisova, Aıgúl Qosanova, Elza Karabalına, Venera Qarjaýbaeva, Armat Islamǵalıev, Kúnqoja Qaı­rýlla qatarly dástúrli án sheberleri Ǵarıfolla shyǵar­malarynan konsert qoıdy. Sonymen birge T.Júrgenov atyndaǵy Qazaq ulttyq óner akademııasynyń jáne Qur­manǵazy atyndaǵy Qazaq ult­tyq konservatorııasynyń shá­kirtteri óz ónerlerin or­taǵa saldy.

Muhıt murasyn búginge jetkizip, qazaqtyń dástúrli ánderin tórtkúl dúnıege pash etken týma talanttyń «Aq Jaıyq», «Súıgen jar», «Nurjamal», «Jan erkem», «Aqqý», «Súıemin týǵan ól­kemdi», «Úsh qyz» sekildi av­torlyq ánderi de – halyq kó­ńilinen oryn alǵan týyn­dylar. Dese de ǵulama jyldar kóshinde qalǵan kóne mý­zy­kalyq muralarymyzdy jańa býynmen qaýyshtyrǵan Ǵarıfolla Qurmanǵalıevtiń shyǵarmashylyq tynysy áli de tereńnen zerttep-zer­delenýge tıis. Bul baǵytta onyń urpaqtary tolymdy eń­bek etip júr.

Rýhanı is-sharaǵa zııaly qa­ýym ókilderimen birge Ǵa­rıfolla Qurmanǵalıevtiń uly Nurlan, kelini Láılá, ne­meresi Merýert qatysty. Eń ǵajaby, ánshiniń urpaqtary da óner men ǵylymnan óris tapqan. Máselen, aty ańyzǵa aınalǵan óner ıesiniń ómir belesteri men shyǵarmashylyq jolynan syr shertetin maz­mundy eńbektiń jaryq kó­rýine nemeresi Merýert Sa­nat­qyzy muryndyq bolǵan. Al atasynyń qanshama ánin notaǵa túsirgen kelini Láılá Qurmanǵalıeva ekenin kópshilik bile bermeıdi.

«Batys óńirindegi Aman­ǵalı, Qumar, Sartaı sekildi halyq kompozıtorlarynyń ánderin keıingige jetkizip, Arqa aımaǵyndaǵy ǵajaıyp týyndylardy batys óńiriniń oryndaýshylyq stıline beıimdep aıtqan birden-bir adam – Ǵ.Qurmanǵalıev. Bul kisiniń ǵalamat ánshi eke­nin kúlli qazaq jaqsy bi­ledi. Al onyń aıtylmaı júr­gen bir qyry – jyrshylyq qabileti. Keshegi bala Oraz ben Jibektiń aıtysy sekildi batystaǵy epostyq jyrlardy qubylta jyrlaǵanyn, halyq termelerin, jyrshylyq saryndardy jańǵyrtqanyn ekshep aıtýymyz kerek», deıdi Qurmanǵazy atyndaǵy Qazaq ulttyq konservatorııasynyń oqy­týshysy Kúnqoja Qaı­rýlla.

Is-shara barysynda Mem­lekettik ortalyq mýzeı qo­ryndaǵy Ǵarıfolla Qurman­ǵalıevtiń fotomaterıaldary men marapattary, tirshiliginde tutynǵan jeke zattary, basqa da jádigerlerden quralǵan shaǵyn kórme kópshilik nazaryna usynyldy.

ALMATY