Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń deregine súıensek, 16 myń adamnyń jalaqysyna ishinara sýbsıdııa beriledi. Memleket tarapynan kórsetiletin mundaı kómekti áleýmettik jáne qoǵamdyq jumystarǵa, jastar tájirıbesine, «Alǵashqy jumys orny» men «Kúmis jas», «Urpaqtar kelisimsharty» jobalary aıasynda jumysqa ornalasqandar alady. Buǵan qosa qysqamerzimdi oqý kýrstarynda 585 adam biliktilik shyńdap, onlaın Skills arqyly 1 880 adam qamtylady. Al 72 adam vaýcherden ótkiziledi. «Bastaý-bıznes» jobasymen kásipkerlik negizderin meńgerý úshin 2 615 adam oqýǵa jiberiledi. О́z isin ashý baǵytynda áleýmettik osal sanattaryndaǵy 291 adamǵa qaıtarymsyz granttar men 2,5 paıyzdyq jeńildik, 142 jasqa mıkrokredıt berý kózdelip otyr. Kásiptik baǵdarlaýdan 15 041 adamdy ótkizý kózdelgen.
Munaıly óńirde múmkindigi shekteýli jandar men probasııa esebinde turǵan, jazasyn óteý oryndarynan bosap shyqqan adamdar úshin jumysqa ornalastyrý kvotasy belgilenip otyr. Olardy jumysqa qabyldaıtyn mekemeler tizbesi bekitilgen.
Qazir óńirde múmkindigi shektelgen 24 534 adam bar. Onyń ishinde birinshi toptaǵy múgedekter – 2 293, ekinshi toptaǵylar sany – 8 789, úshinshi toptaǵylar – 9 254. Al 4 198 balaǵa múgedektik sanaty berilgen. Múmkindigi shektelgenimen, tabys tapqysy keletinder az emes. Máselen, byltyr jumyspen qamtý ortalyqtaryna múmkindigi shektelgen, biraq jumys isteýge qabiletti 1 182 adam júgingen. Onyń ishinde 1 019 adamǵa áleýmettik qoldaý kórsetilgen.
«Byltyr basqarmaǵa júgingen múmkindigi shekteýli jandardyń arasynan 273 adam turaqty jumysqa ornalasty. Onyń 77-si kvotamen qamtyldy. Al aqyly qoǵamdyq jumysqa 328 adam tartyldy. Áleýmettik jumys ornyna 17 adam, jastar tájirıbesine 35 túlek jiberildi. «Alǵashqy jumys orny» jobasy arqyly – 7, «Kúmis jas» jobasy sheńberinde jasy 50-den asqan 18 adam jumys tapty. «Bastaý-Bıznes» jobasymen kásipkerlik negizderi kýrsynan múgedektik sanatyndaǵy 289 adam ótti», dep habarlady basqarmanyń baspasóz qyzmeti.
Sondaı-aq «Teńizshevroıl» kompanııasynyń qoldaýymen oqý kýrsyna – 4, arnaıy jumys ornyna 7 adam jiberilgen. Al 41 adamǵa 400 aılyq eseptik kórsetkish kóleminde memlekettik grant berilgen. Múmkindigi shektelgen 7 adamnyń jumys orny arnaıy qural-jabdyqtarmen qamtamasyz etilip otyr.
Atyraý oblysy
