Kez kelgen búldirshinniń ǵajaıypqa ılanatynyna talas joq. Biz akrobattardyń ıkemdiligine, táýekelge toly áreketterine udaıy tańdaı qaǵamyz, kloýndardyń ázil-ájýalaryna tamsanamyz, jumbaq sıqyrshylardyń eńbegine qol soǵamyz, qoshemet kórsetemiz. Bul endi ıllıýzıonıst sıqyrshylardyń tolassyz izdenisiniń jemisi shyǵar. Bir anyǵy sırkti unatpaıtyn adam kemde kem.
Halqymyz sırk óneri dese, Qazaq memlekettik sırki ujymynyń tolaıym tabysyn eske alatyny daýsyz. Táýelsizdiktiń eleń-alań tusynda kári qurlyq pen sary qurlyqtyń áldeneshe elin aralap, alýan túrli nómirmen sheteldik kórermenderdi tánti etken ujymnyń eseli eńbegi jurttyń jadynan óshpeıtini aqıqat. Elý jyldan astam tarıhy bar ujymnyń ár jyldardaǵy jańa nómirleri talaı bıikti baǵyndyryp, tolaıym tabysqa jetýge jol ashqany málim.
Taraz dese, «Balaýsa» sırk ujymy eske túsedi. Osy ujym týraly áńgime qozǵala qalsa, Talǵat Álshikenovtiń tabandylyǵyna toqtalmaý múmkin emes. Sırk óneriniń otymen kirip, kúlimen shyqqan maman keıingi býyn jastarǵa bilgenin úıretýden jalyqpaıtyny aqıqat. Ol áleýmettiń eńsesi túsken qıyn ýaqyttarda ónerge degen adaldyǵynan aınyǵan emes. Jankeshtiliginiń arqasynda jas býyn sırk ártisterin tárbıelep shyǵardy, olarǵa bilgenin úıretti, tájirıbesimen bólisti. Bir sózben aıtqanda, jańa býyn ónerpazdar tolqynyn qalyptastyrý jolynda aıanbaı eńbek etti.
Derekke sensek, halyqaralyq deńgeıde uıymdastyrylǵan «Dańq mınýty» teleshoýynda talaı jurtty talantymen tánti etken plastıkalyq dýet Darııa Abdýhasova men Dana Ryspekova da Talǵat Álshikenovtiń tálimin alyp, tájirıbesin tolystyrǵan mamandar eken. Osyǵan qarap-aq sırk ónerin jańa bıikke kóterý jolynda talmaı ter tógip júrgen azamattyń eńbegi qandaı da bolsyn, joǵary baǵaǵa laıyq ekenin ańǵarý qıynǵa soqpaıdy.
Kenen Ázirbaev atyndaǵy oblystyq fılarmonııanyń «Alataý» án-bı ansambliniń quramynda bolǵan ujym 2012 jyldyń basynda «Balaýsa» sırki degen ataý aldy. Talǵat Álshikenov jetekshilik etetin ujymnyń quramynda Talap Taýbekov, Aıdyn Álshikenov syndy ózge de talantty sırk ártisteri jetip artylady. Olardyń barlyǵy da ondaǵan nómirlerde kórermenniń kóńilinen shyǵatyndaı deńgeıde óner kórsetip júr.
Sırk ujymy elimizde alǵash ret «Dala erkeleri», «Arqanmen sekirý oıyny», qolǵa úıretilgen kógershinderden quralǵan «Aqtolqyn» qoıylymyn jurttyń nazaryna usynyp, «Ikarııka oıyny», «Býynsyz dene» nómirlerimen kópshiliktiń kóńilin aýlady. Ýaqytynda magııaǵa toly áreketter arqyly ónersúıer qaýymnyń júreginen oıyp turyp oryn alǵan ujymnyń kóptegen nómirlerin sheteldik kórermender de tamashalap, tolassyz qoshemet kórsetti.
Sırk stýdııasy retinde shırek ǵasyrǵa jýyq ýaqyt buryn jumysyn bastaǵan ujymnyń qol jetkizgen tolaıym tabystary da az emes. «Balaýsa» ujymy 2004 jyly Astana qalasynda ótken shyǵarmashyl jastardyń halyqaralyq «Shabyt» festıvalinde «Aqtolqyn» nómirimen júldeli ekinshi orynǵa ıe bolsa, «Plastıkalyq etıýd» nómiri úzdik úshtikke ilindi. Sondaı-aq «Dala erkeleri» A.Demıanenko atyndaǵy arnaıy atalym boıynsha marapattaldy. Budan bólek «Býynsyz dene» qoıylymy B.Jumaǵulov atyndaǵy arnaıy syılyqqa laıyq dep tanylsa, «Jongler» toby ekinshi oryndy, «Aqtolqyn» nómiri birinshi oryndy ıelendi.
Jambyldyq ónerpazdardan quralǵan ujymnyń halyqaralyq deńgeıde jetken jetistikteri de az emes. Ujym 2008 jyly Qytaıda ótken sırk festıvalinde qola júldeger atansa, 2010 jyly Armenııada ótken sırk festıvalinde «Býynsyz dene» nómirimen birinshi orynǵa laıyq dep tanylyp, altyn júldeni jeńip aldy. Sonymen qatar «Qazaqstan» ulttyq arnasy uıymdastyrǵan «Juldyzdy sát» telebaıqaýynda top jardy, «Habar» telearnasy ótkizgen respýblıkalyq «Aımaqtar alamany» telejobasynyń laýreaty ataǵyna qol jetkizdi.
2019 jyldyń 1 aqpany men 17 sáýiri aralyǵynda «MTG» agenttigi uıymdastyrǵan, Túrkııanyń Ystanbul qalasynda ótken «Sıqyrshylar» festıvalinde úzdik atanǵan Talap Taýbekov irikteý kezeńinen irkilmeı ótti. Sonyń arqasynda Qatar astanasy Doha qalasynda uıymdastyrylǵan, 118 memlekettiń sıqyrshylary qatysqan «MAGIC FESTIVAL – 2018» festıvaline joldama alyp, álemniń «sen tur, men ataıyn» deýge laıyq ónerpazdary qatysqan dodada júldeli ekinshi oryn ıelendi.
«Shyny kerek, qaıda eńbek etsem de, basqa bir jaqqa jumys saparymen barsam da, týǵan jerge degen qurmet ilki sátke de azaıǵan emes. О́ziń týǵan jerde eńbek etip, keıingi býyn talanttardyń talabyn ushtap, olardyń ónerin óristetkenge ne jetsin? Biz úshin odan asqan baqyt ta, baılyq ta joq. Eń bastysy, boıymyzdaǵy ónerdi izbasar jastardyń sátimen jalǵastyrǵanyn qalaısyń. Bul endi kez kelgen aǵa býynnyń mindeti ǵoı», degen Talǵat Álshikenovtiń «Balaýsa» sırk ujymyn áli talaı bıikke bastaıtynyna eshkimniń talasy joq.
Qalaı desek te sırk – ózindik álemi bar bekzat óner. О́rkendegen elder dál osy ónerdi óristetýge bekerden-beker aıryqsha nazar aýdaryp otyrǵan joq. Elimizdiń ár qıyrynda eńbek etip júrgen ártisterdiń eńbegin jankeshtilik dep te baǵalaǵan jón shyǵar. Aılyq pen shaılyqtyń azdyǵynan talaı talantty azamattar boıyndaǵy talantyn óltirmeý úshin qyr asyp ketkeni belgili. Sol turǵydan kelgende óńirlerde ter tógip júrgen talanttardyń jumysy joǵary baǵaǵa laıyq.
Taraz
