Foto: egemen.kz
«Elimizdegi óndiristiń damýyna tyń serpin berý qajet. Barshaǵa túsinikti jáne tıimdi ındýstrııa saıasatyn júrgizý úshin byltyr jeke mınıstrlik quryldy. Sodan beri biraz ýaqyt ótti, endi jumystyń nátıjesin kórsetý kerek. Mınıstrlik salanyń damý baǵdaryn anyqtap, ınvestorlarǵa jol kórsetýi kerek. Ozyq tehnologııany qoldanatyn jańa óndirister ashý qajet. Alaıda, naqty sharalar men ádis-tásilder daıyn emes. О́ndiristiń damýyna serpin beretin jobalardyń tizimi bar, degenmen, bul jumys ta tolyq aıaqtalmaǵan. Bul óndirister ekonomıka qurylymyn ózgertýge, elimizdiń myqty ónerkásiptik negizin qalaýǵa jáne tehnologııalyq ósimdi qamtamasyz etýge tıis. Ázirge munyń eshqaısysy iske asqan joq», dedi Q.Toqaev.
Memleket basshysy Úkimet halyqaralyq qarjy ınstıtýttarymen, transulttyq korporasııalarmen jáne otandyq kásipkerlermen aradaǵy syndarly dıalogty nyǵaıta túsýi qajet ekenin aıtyp, jańa óndiris oryndaryn ashý, jańǵyrtý máselesine toqtaldy.
«Memleket bolashaqta elimizdiń ekonomıkalyq órkendeýine negiz bolatyn aýqymdy ári ınnovasııalyq jobalardy birinshi kezekte qoldaýy qajet. Osy tusta, jumys istep turǵan óndiristerdi jańǵyrtýmen qatar, elimiz úshin múlde jańa óndiris oryndaryn ashýǵa basa mán berý kerek. Jalpy, elimizdiń bolashaqtaǵy ındýstrııalyq kelbeti qandaı bolady, qandaı kásiporyndar mańyzdy ról atqarady degen saýaldarǵa jaýap bolýǵa tıis. Ýaqyttyń talabyna saı belsendi jumys isteý kerek», dep túsindirdi Prezıdent.
Qasym-Jomart Kemeluly qazirgi óndiris oryndaryn túbegeıli jańǵyrtý máselesi taǵy bir mańyzdy mindet ekenin aıtty. El Prezıdentiniń aıtýynsha, bul jumysty, eń aldymen, ábden tozǵan metallýrgııa kombınattarynan bastaý kerek. О́ıtkeni, ondaǵy jaǵdaı óte nashar deýge bolady.
«Sebep – bárimizge belgili. О́ndiristi damytýǵa jáne jańǵyrtýǵa qajetti ınvestısııa salynbaıdy. Sonyń saldarynan daıyn ónimniń qosylǵan quny tómendeıdi, sapaly jumys oryndary azaıady», dep tolyqtyrdy Memleket basshysy.
