Maıqaıyń óz aldyna eldi meken bolǵaly onyń ekonomıkasy jerasty baılyǵyna táýeldi. Altyn kenishi jergilikti halyqty asyrap otyr. «Maıqaıyńaltyn» aksıonerlik qoǵamy Ertistiń Pavlodar óńirindegi eń alǵash qurylǵan taý-ken óndirisi ekenin de atap ótken abzal. Ondaǵy kenishke tuńǵysh ekskavator 1940 jyly túsirilgen eken. Ol býmen jumys isteıtin edi. Búginde kásiporynǵa eki kenish jáne ken-baıytý fabrıkasy qaraıdy. Jergilikti halyqtyń deni búginde altyn óndirisinde eńbek etedi.
– Maıqaıyń kentiniń ákimshilik aýmaǵyna Maıkóbe, Sulýjon, Úshqulyn, Shóptikól aýyldary kiredi. Búginde kent pen oǵan qarasty aýyldarda «Maıqaıyńaltyn» AQ-nan bólek, paıdaly qazbalar óndirýmen 5 birdeı kásiporyn aınalysady. Olar – kómir óndiretin «Maıkýben Vest» aksıonerlik qoǵamy, «Qazaqstan alıýmınııi» AQ-nyń fılıaly – «Keregetas» kenishi, «Maıqaıyń aqtas óndirý zaýyty» JShS, «Pnevmosoqqysh burǵylaý» ǵylymı óndiristik kásiporny» JShS, «IBM Gold» JShS, – deıdi Baıanaýyl aýdanynyń ákimi Ardaq Kisentaev.
Byltyr «Maıqaıyńaltyn» AQ aýdandyq bıýdjetke 840 mln 714 myń teńge salyq tólegen. Eń úlken salyq tóleýshi – «Maıkýben Vest» AQ, ótken jyly bul óndiris orny jergilikti qazynaǵa 1 mlrd 681,3 mln teńge qarjy quıǵan.
Sonymen qatar jerdi paıdalanǵany úshin 2023 jyly kelesideı qosymsha salyqtar tólengen:
«Maıqaıyńaltyn» AQ – 6 mln 739 myń teńge;
«Maıkýben Vest» AQ – 46 mln 314 myń teńge;
«Keregetas» kenishi – 8 mln 329 myń teńge;
«Pnevmosoqqysh burǵylaý» JShS – 1 mln 531 myń teńge;
«Gravelıt» JShS – 192 myń teńge. Sońǵy atalǵan eki kásiporyn jergilikti kásipker Tımýr Qabdýlovke tıesili. Ol – «Maıqaıyńaltyn» AQ Bas dırektorynyń keńesshisi Orynjan Qabdýlovtyń uly.
Altyndy aımaqtyń damýyna úles qosqan azamattar az emes. Bul tizimde el arasynda «Maıqaıyńnyń Muhtary» atanǵan Muhtar Ábenovtiń esimi alǵash bolyp atalary anyq. Muhtar aǵa da bıyl 92 jasqa tolǵaly otyr. Ken baıytý kombınatynyń barlyq jumys satysynan ótken eńbek ardageri – qurmet demalysynda da qarap qalmaǵan jan. Eldi jumyldyryp, kenttegi ıgi jumystarǵa bastamashy boldy. Sonaý 1958 jyly uly jazýshy Muhtar Áýezov osy óńirge arnaıy kelgende birge erip júrip, keıin sol sapar týraly estelikter jazdy. Álem tanyǵan alyp qalamgerdiń esimi Maıqaıyń №1 qazaq orta mektebiniń berilýine bir ózi túrtki boldy. Belsendi qarııa kóp jyldar kenttegi ardagerler keńesin basqaryp, urpaq tárbıesiniń damýyna mol eńbek sińirdi. Ol kisiniń bastamasymen kentte úlken mýzeı ashyldy.
Pavlodar oblysy,
Baıanaýyl aýdany,
Maıqaıyń kenti
