Qala ákimi Shákir Keıkınniń deregine súıensek, «Nursaıa» shaǵyn aýdanyndaǵy «Latıfa» turǵyn úı kesheninen 38 páter berildi. О́zge otbasylarǵa basqa turǵyn úı keshenderinen páter usynylǵan.
«Qazir Atyraý qalasynda 21 myńnan asa adam turǵyn úı alý kezeginde tur. Onyń bárine bir kúnde páter berý múmkin emes. Jergilikti atqarýshy organ muqtaj jandardy baspanamen qamtýdy qolǵa alyp otyr. Jyl sońyna deıin taǵy 100 otbasy jańa baspanaǵa ıe bolady», deıdi Sh.Keıkın.
Jańa baspanaǵa ıe bolǵandardyń qatarynda Janserik Darǵojınniń otbasy da bar. Ol Inderde er jetkenimen, qazir Atyraý qalasyna kóship kelgen. Bul otbasyǵa úsh bólmeli páter berildi. «Páter kezeginde 2015 jyldan beri turmyn. Osy kezge deıin páter jaldap júr edik. Jańa páter aldyq, qýanyshymyzda shek joq», dedi ol.
Osyndaı qýanyshqa kópbalaly ana Ásemgúl Rysmaǵambetova da keneldi. Osy kezge deıin otbasymen aǵaıyn-týystarynyń úıinde turǵan. «О́z baspanamyz bolǵanyn armandap júr edik. Balalarymyzdyń nesibesi shyǵar, jańa páterge ıe boldyq», deıdi kóz jasyna erik bergen kópbalaly ana.
«Latıfa» turǵyn úı kesheniniń qurylysyn «Nur Atyraý qurylys» JShS júrgizgen. Seriktestik dırektory Nurlan Nurmuhanovtyń aıtýynsha, turǵyn úı keshenine úleskerlerden qarjy alynbaǵan.
«Turǵyn úı kesheniniń qurylysyn óz qarjymyzǵa júrgizdik. О́ıtkeni bizge úleskerlerdiń qarjysyn alýǵa ruqsat berilgen joq. Qalalyq ákimdiktiń kópbalaly otbasylar men múmkindigi shekteýli jandarǵa páter satyp alý úshin jarııalaǵan tenderine qatystyq. Ashyq tenderden 42 páterge tapsyrysty utyp aldyq. Munda bir bólmeli páterdiń aýmaǵy – 40 sharshy metr, eki bólmeli – 60 sharshy metr, úsh bólmeli – 80 sharshy metr. Ár páter avtonomdy jylý júıesimen jabdyqtalǵan. Ár otbasynyń páterindegi jylýdy qalaǵan ýaqytynda qosyp, ajyratýyna múmkindik jasalǵan», dep málim etti N.Nurmuhanov.
Atyraý oblysy
