44 jastaǵy Premer-mınıstr Oljas Bektenov bul máseleni sheshe ala ma degen alań kóńil bar. Men saıasattanýshy retinde másele jasta emes, tabandylyqta der edim. Tarıhqa kóz salsaq, Turar Rysqulov jıyrmadan asqan shaǵynda Máskeýde Halyq komıssarıaty tóraǵasynyń orynbasary boldy.
Kóp nárse Premer-mınıstrdiń ǵana emes, Úkimet quramynyń tabandylyǵyna da baılanysty. Qaı jerge qarasań da problemalar bar.
Tipti Memleket basshysy Qasym-Jomart Toqaev sheneýnikterde bastama jetispeıtinin, jaýapkershilikti óz moınyna alyp, sheshim qabyldaýdan qorqatynyn aıtty. Alda sheshimin kútip turǵan másele kóp. Prezıdent sózden iske kóshý kerektigin bul joly taǵy da eskertti.
Al men kásipker retinde Úkimet quramyndaǵy ózgeristerge nazar aýdardym. Qarjy jáne Ulttyq ekonomıka mınıstrligi basyna buryn osy saladan ótken, tájirıbe jınaǵan bilikti mamandar keldi. Bılik pen qoǵam arasynda syndardy suhbat bolǵan kezde ǵana qoǵam alǵa jyljıdy. Dál qazir salyq deńgeıine qatysty ózgeristerge kóńili tolmaıtyndar kóp. Bul másele jańa Úkimet quramynda oń sheshimin tabady dep úmittenemin. Sebebi eldiń qazynasyn tek salyqpen emes, basqa joldarmen de toltyrýǵa bolady. Zań túzýlense, naryq deldaldardan taza bolady, bıznes ósedi, qanatyn jaıady, keńeıedi. Biz bıýdjet túsimin salyqpen emes, ShOB qataryn kóbeıtý arqyly arttyrýǵa da basymdyq berýimiz kerek.
Memleket basshysy kóleńkeli ekonomıkany azaıtý júıesin jetildirý boıynsha jumys isteýimiz kerektigin, eger durys basqarý qurylmasa, eń ozyq salyq saıasaty da tıimsiz bolatynyn aıtty. Bıznes segmentinde kóshtiń baǵyty túzý bolsa, kóleńkeli ekonomıkanyń da úlesi azaıady.
Úkimet basyna kelgen Premer-mınıstr Oljas Bektenovtiń negizgi mindetteri barlyq mınıstrlik pen memlekettik organnyń qyzmetine qatań baqylaýdy júzege asyrý, sondaı-aq memlekettik apparattaǵy sybaılas jemqorlyqpen kúres jumysyn kúsheıtý, iri bıznestiń ózara árekettesýimen baılanysty bolady dep oılaımyz.
Ekonomıkalyq úderisterdi basqarý reformalardyń barysyna jaýap beretin vıse-premerler ınstıtýtyn qalyptastyratyn kez keldi dep sanaımyn. Osy ınstıtýtqa memlekettik baǵdarlamalarǵa bólingen qarjy emes, túrli jobalarǵa bólingen qarjyny baqylaý quzyreti berilýi kerek.
Mahambet ASABAEV,
kásipker
ALMATY
