Onyń mánisi bylaı. Aqyn 1919 jyly ataman Annenkovtyń azap vagonynda bolyp, Ombydaǵy túrmeden jaıaý qashqanyn baıandaı kele búı deıdi: «Sóıtip, bárin qosqanda ýaqyttyń qıynshylyqty kezinde jaıaý segiz júz (800) shaqyrym jol júrip, Semeı, Aqmola gýbernııalarynyń tórt ýeziniń túıisken jerindegi Saryadyrdyń basynda Balabaı aýylyna kelip demaldym, segiz júz shaqyrym jol júrdim degenim mynaý:
1919 jyly qylshyldaǵan qańtarda ataman Annenkovtyń otrıady bizdi Aqmoladan Qyzyljarǵa aıdap keldi. Aqmola – Qyzyljar arasy bes júz (500) shaqyrym. Munyń úsh júz elý shaqyrymdaıyn jaıaý júrdim. Ombydan qashyp, otarbamen Slavgorod kelip, odan qar erı bastaǵan kezde Pavlodarǵa jaıaý keldim. Júz elý eki (152) shaqyrym. Pavlodardan kóksoqta sý men Baıanǵa jaıaý keldim. Júz toqsan eki (192) shaqyrym. Baıannan Saryadyrǵa — Balabaı aýylyna jaıaý keldim júz shamaly shaqyrym. Bárin qosqanda — (800) segiz júz shaqyrym bolady», dep qorytady.
Mundaǵy Saryadyrdaǵy Balabaı aýyly – Baıanaýyl mańy, kezinde Sákenniń basynan ótken bul oqıǵa týraly jazýshy Sáıdil Taljanov ta jazǵanyn bilemiz. Abaqtydan aq qar, kók muzda jaıaý qashyp, azyp-tozǵan Sáken osy Balabaıdyń aýylynda jatyp kúsh alady. Sondaǵy bir oljasy – jylqyda júrgen Balabaıdyń qyzy Sáýlim salǵan «Zulqııanyń áni». Ánniń shyǵý tarıhyna toqtalǵan aqyn mátinin de tolyq keltiredi. Bertinde oryndaýshylar eki aýyzyn ǵana oryndap, keltesinen qaıyratyn sekildi. Álde tolyqtaı salsaq, án sozylyńqyrap tyńdarmandy jalyqtyryp alamyz deı me eken, belgisiz. Sonymen sózdi Sákenge beremiz: «Zulqııa» Aqmoladan shyqqan belgili án edi. Zulqııa esimdi bir baqytsyz áıeldiń zary... Zulqııa zarly, qasiretti ánin jas baladaı ózin-ózi jubatyp otyryp salǵan tárizdi...
...Ospanbaıdyń qyzy edim men Zulqııa,
Zulqııanyń qolynda garmonııa.
Áldı-aı!
Bir jamanǵa qor bolyp ketkenimshe,
Bir jaqsymen bolaıyn kompanııa,
Áldı-aı!
Qoı, qoı bópem! Qoı, bópem!
Jylama, sáýlem, áldı-aı!
Myń sıyrdy bastaǵan ker qunajyn,
Qasiret oılaı betime tústi-aý ájim,
Áldı-aı!
Mal berdim dep bir jaman ıe bolad,
Qasirettiń isine bar ma lajym? —
Áldı-aı!
Qoı, qoı, bópem! Qoı, bópem!
Jylama, sáýlem, áldı-aı!
Qyzyl shilik aýylym aralynda,
Teńim emes sol jaman, baramyn ba?
Áldı-aı!
О́zim teńdi sol jaman adam bolsa,
Saý basyma saqına salaıyn ba?
Áldı-aı!
Qoı, qoı, bópem! Qoı, bópem!
Jylama, sáýlem, áldı-aı!
Kim tyńdaıdy qyz sorly jylaǵanmen?
Kózdiń jasyn kól qylyp, bulaǵanmen?
Áldı-aı!
Shyńyraýǵa túsken soń shyǵý qıyn,
Jalbarynyp táńirden suraǵanmen,
Áldı-aı!
Qoı, qoı, bópem! Qoı, bópem!
Jylama, sáýlem, áldı-aı!
Iá, ózin-ózi jubatpasa, kim jubatqan qyz sorlyny?! Kim tyńdaǵan qyz sorlynyń jylaǵanyn, kim kórgen onyń kóz jasyn?!» deıdi Sáken Seıfýllın «Tar jol, taıǵaq keshý» romanynda. Qazirgi ánshiler osy shýmaqtardyń alǵashqysyn oryndaıdy, qalǵan bir shýmaǵy Sáken keltirgen myna sózdiń ishinde kez-despeıdi. Al Saparǵalı Begalınniń jazýynda Maıra oryndaǵan Zulqııa ániniń bir shýmaǵy múlde basqa:
«Qyzy edim men Zulqııa Ospan baıdyń
Qolynda Ábilqasym bolysnaıdyń.
Taqsyr-aý, mızamyńa múmkin bolsa
Aldyńnan kishilikpen jol suraımyn»,
bolyp keledi. Eger jazbamyz keıingilerdiń keregine jarap jatsa quba-qup, paryzdyń ótelgeni.
