Ekonomıkalyq zertteýler ınstıtýtynyń habarlaýynsha, 2023 jyldyń 11 aıynda Qazaqstanǵa ımport 54,6 mlrd dollarǵa jetti, bul 2022 jyldyń osy kezeńimen salystyrǵanda 20,4 paıyzǵa artyq. Importtyń rekordtyq kóleminiń qalyptasýyna shetelden elge avtomobılder men joǵary tehnologııalyq taýarlardy jetkizýdi ulǵaıtý áser etti.
2022 jylǵa deıin eldiń negizgi saýda seriktesi Reseı Federasııasy boldy, onyń úlesi jyl saıyn 20-24 paıyzǵa deıin jetetin edi. Alaıda 2022 jylǵy geosaıası ózgeristerge baılanysty 2023 jyly elimizdiń bas saýda seriktesi mártebesin 22 paıyz úlespen Qytaı ıelendi, al Reseı Federasııasyna tıesili úles – 19 paıyz.
Eksporttyń tómendeýi munaı baǵasynyń tómendeýimen baılanysty. Qazaqstan eksporty 11 aıda 8,5 paıyzǵa, 71,3 mlrd dollarǵa deıin tómendedi. Bul, eń aldymen, munaı kiristeriniń – 12,4 paıyzǵa, 38,3 mlrd dollarǵa deıin tómendeýimen baılanysty. Bul rette tonnamen sanaǵanda qazaq munaıynyń eksporty – 7,2 paıyzǵa, 60,5 mln tonnadan 64,9 mln tonnaǵa deıin ósti.
Shıkizattyq emes taýarlardyń eksporty tómendedi. Osy jyldyń qańtar-qarasha aılarynda Qazaqstan Respýblıkasynan shıkizattyq emes taýarlardyń eksporty – 4,5 paıyzǵa, ıaǵnı 22,8 mlrd dollarǵa deıin tústi. Bul negizinen aralyq taýarlar (jartylaı fabrıkattar) eksportynyń – 7,2 paıyzǵa, 18,2 mıllıard dollarǵa deıin tómendeýimen baılanysty. Mysaly, negizgi metaldardyń sheteldik satylymy – 9,3 paıyzǵa, 12,4 mlrd dollarǵa deıin, al munaı óńdeý ónimderiniń eksporty – 34,2 paıyzǵa, 1,5 mlrd dollarǵa deıin tómendedi.
