Memleket qaıratkeri, qazaqtyń kórnekti dıplomaty, Tótenshe jáne ókiletti elshi Asqar Ahmetuly Mýsınov 63 jasqa qaraǵan shaǵynda kenetten qaıtys boldy. Bul týraly Syrtqy ister mınıstrligi málim etti.
Uzaq merzimdi dıplomatııalyq qyzmet barysynda ol Qazaqstan Respýblıkasynyń SIM Ortalyq apparatynda jáne shet elderdegi mekemelerinde ózi jetekshilik etetin jumystyń barlyq baǵyttarynda Qazaqstannyń múddelerin tamasha qorǵap, alǵa qoıylǵan mindetterdi kásibı túrde sheshýde qabileti men tereń bilimin kórsete bildi. SIM Jaýapty hatshysy jáne Syrtqy ister mınıstriniń orynbasary retinde ol Taıaý Shyǵys jáne Afrıka qurlyǵy elderimen ekijaqty qarym-qatynastardy nyǵaıtýǵa, konsýldyq qyzmet pen memlekettik protokoldy damytýǵa zor úles qosty.
Mysyrdaǵy, Saýd Arabııasyndaǵy, Birikken Arab Ámirlikteri men Ońtústik Afrıka Respýblıkasyndaǵy Tótenshe jáne ókiletti elshi qyzmetin atqara júrip, Qazaqstan múddesin kásibı túrde ilgeriletip, qorǵady. Islam Yntymaqtastyǵy Uıymy Bas hatshysynyń Ǵylym jáne tehnologııa jónindegi orynbasary jáne Azyq-túlik qaýipsizdigi jónindegi ıslam uıymynyń Bas dırektory retinde halyqaralyq beıbitshilik pen turaqtylyq isine adal qyzmet etti.
Dıplomatııalyq ortada ol óz Otanynyń naǵyz patrıoty, joǵary deńgeıdegi dıplomat jáne arab baǵytyndaǵy qazaq dıplomatııa mektebiniń negizin qalaýshylardyń biri retinde tanymal boldy.
