Osy kúnnen bastap Aral qalasynan 20 shaqyrym qashyqtyqta jol patrýldik polısııasynyń 6 ınspektory qaýipsizdik sharalaryna kirisip ketti. Búginde aýdan aýmaǵynda joldan qalǵan 1 225 avtokólik pen 3 myńǵa jýyq jolaýshy tur. Osyǵan baılanysty aýdanda arnaýly shtab qurylyp, jergilikti erikti jastar, mekemeler jáne kásipkerler jolaýshylarǵa tegin ystyq tamaq uıymdastyrýǵa kirisip ketti. Uzaq jolǵa balamen shyqqan jolaýshylar Aral qalasyndaǵy ındýstrıaldy-tehnıkalyq kolledj jataqhanasyna ornalastyryldy. Medısına qyzmetkerleri kúnine eki mezgil jolaýshylardy aralap, densaýlyǵyn baqylap júr.
Osyndaı aralaý barysynda 8 aqpan kúni Tájikstannan Samaraǵa sapar shekken 28 jastaǵy Mahfıloro Masrýrovaǵa medısınalyq kómek qajet ekeni anyqtalyp, aıaǵy aýyr kelinshek jedel járdemmen aýdandyq perzenthanaǵa jetkizilip, kómek kórsetildi. Qınalǵan jurtqa járdem uıymdastyryp júrgen azamattar jol ashylǵansha Mahfılırony dárigerlerdiń qaraýynda qaldyrý týraly sheshim qabyldap, ol aýrýhanaǵa jatqyzyldy.
Kúre jolda qalyp qoıǵandardyń jaǵdaıyn oblys ákimi Nurlybek Nálibaev udaıy baqylap otyr. Aıaq asty bolǵan jaǵdaıdan abdyrap qalǵan jolaýshylarǵa Aral aýdanynyń ákimi Amanjol Ońǵarbaev kelip, jaǵdaıymen tanysty. Jergilikti ákimdik jol boıyndaǵy qyzmet kórsetý keshenderindegi azyq-túlik pen tamaq baǵasy qymbattamaýyn baqylaýǵa aldy. Jolda qalǵandardyń deni – О́zbekstan, Tájikstan, Qyrǵyzstan eliniń azamattary. Olardyń basyndaǵy sál qıyndyqty paıdalanyp, qarjy qarpyp qalýdy kózdemeı, kerisinshe qoldan kelgen járdemin berýge umtylǵan jergilikti turǵyndardyń bul jaqsylyǵy «Jolaýshynyń úlespegen enshisi bar» degen baıaǵy babalar támsiliniń áli de mánin joımaǵanyna kózimizdi jetkizip, júrekke jylý uıalatty. Aýdan ákimdiginiń úılestirýimen erikti jastar, kásipkerler men mekemeler tegin as ta uıymdastyryp, jolaýshylardyń qınalyp qalmaýyn barynsha qadaǵalap otyr.
Aralmen kórshiles Qazaly aýdanyndaǵy Oıyndy eldi mekeni tusyndaǵy «Mıras» servıstik kesheninde 135 júk kóligi men 35 jeńil avtokólik osharylyp tur. Mundaǵy kólikterde 200-ge jýyq adam bar. Olardyń jaǵdaıyn bilýge barǵan aýdan ákimi Muhtar Orazbaev jol boıyndaǵy keshen basshylyǵymen jolaýshylarǵa tamaqty arzan baǵamen berýdi kelistirdi. Aqpannyń alapatynan jolda qalyp qoıǵandarǵa qajetti kómek kórsetilip, dári-dármek, aýyzsý tegin úlestirildi. Balaly jolaýshylarǵa keshenniń qonaqúıinen tegin jatyn oryndar daıyndaldy.
Kúndiz-túni kólik aǵyny tolastamaıtyn kúre jol boıyndaǵy «Mıras», «Arzan 1» keshenderindegi qazirgi qarbalas qonaq kútken úıdiń tirligine kóbirek uqsaıdy. Jumylǵan jastar kartop-sábizin arshyp, ár jerde qazan-qazan palaý asyp, jolaýshylarǵa tegin tamaq pen ystyq shaı berilip jatyr.
Jolda qalyp qoıǵandardyń jergilikti ákimdik pen qol ushyn sozǵandarǵa alǵysy sheksiz. Araldaǵy kolledj jataqhanasyna ýaqytsha oryn tepken tájik áıeli osy jaǵdaıdan keıin jer betinde jaqsy adamdardyń kóptigine sene bastaǵanyn aıtady. Osyny aıtqanda onyń kózinen móltildegen jas kórindi. Bul jarty álemdi jalǵaǵan kúre joldyń boıyndaǵy jurttyń ózderine kórsetken alǵaýsyz peıiline degen rızalyq edi.
Boran basylyp, jaǵdaı turaqtalǵan soń avtokólikter jol polısııasy bastaýymen saparyn jalǵastyrady.
Qyzylorda
