Sýret Densaýlyq saqtaý mınıstrliginiń saıtynan alyndy
Dárigerler 36 jastaǵy pasıentke kóp túıindi eýtıreoıdty zob (túıinniń mólsheri 5 sm-den asa) dıagnozyn qoıǵan. Operasııany júrgizýge ınstıtýt basshylyǵy Astana qalasy Ulttyq ǵylymı medısınalyq ortalyǵynyń ıntervensııalyq onkoradıolog dárigeri Nııaz Malaevty shaqyrǵan. Biregeı az ınvazıvti operasııaǵa klınıkanyń rentgenhırýrgteri men endokrınolog dárigerleri de qatysqan.
Túsiniktirek bolý úshin aıtsaq, radıojıilikti ablıasııa – isik tinine áser etýdiń zamanaýı ádisteriniń biri. Mundaǵy maqsat – neoplazmany tolyq joıý. Nátıjesinde, qalqansha beziniń túıindi isik jasýshalary ketedi. Túıinniń kólemi kishireıedi, ýaqyt óte azaıady. Esesine, osy kezde bezdiń saý tinderi zaqymdanbaıdy.
– Elimizde 2022 jyldan beri qoldanylyp kele jatqan radıojıilikti ablıasııa ádistemesi qalqansha beziniń qatersiz túıindik isikterin emdeýde jaqsy nátıje kórsetti. Tıimdi ári qaýipsiz. Qalqansha beziniń túıinderiniń kópshiligi qatersiz jáne sımptomsyz. Biraq úlken túıinder kosmetıkalyq problemalarmen qatar, moıyn aǵzalarynyń qysylý belgilerin, aýyrsyný, dısfagııa, yńǵaısyzdyq týdyryp, tamaqtyń jybyrlatyp, jótel shaqyrýy múmkin, – dep túsindiredi Nııaz Beısenuly.
Radıojıilikti ablıasııa – asqyný jıiligi tómen qalqansha beziniń qatersiz túıinderin emdeýdiń qaýipsiz ádisi. Ony álemniń damyǵan elderiniń kóptegen kásibı endokrınologııalyq qoǵamy usynady. Vızýaldyq ýltradybystyq baqylaýmen termııalyq radıojıilikti ablıasııa ádisi álemniń damyǵan elderinde keńinen qoldanylady. Osy ádisten keıin pasıentterdiń ómir súrý sapasy jaqsarady. Bir sózben aıtqanda, radıojıilikti ablıasııa – qalqansha bezdi hırýrgııalyq jolmen alyp tastaýǵa tamasha balama. Emshara narkozdy qajet etpeıdi. Tek qalqansha beziniń qatersiz túıinderindegi aýyrsynýdy baqylaý úshin anestezııa qoldanylady eken. Emsharadan keıin az-kem aýyrsyný baıqalǵanymen, asa mazany almaıdy desedi. Emsharadan keıin Aınur esimdi pasıenttiń ózi radıojıilikti ablıasııa týraly pikirin aıtypty.
– Dárigerlerge barǵan kezde maǵan hırýrgııalyq alyp tastaý usynyldy. Biraq men odan bas tarttym. Radıojıilikti ablıasııany durys sanadym. Emsharadan aldyn maǵan qalqansha beziniń sıtologııalyq zertteýi júrgizildi. Ony aýyrsynbadym. Qazir ózimdi jaqsy sezinemin jáne búgin úıge shyǵamyn. Men dáriger Nııaz Beısenulyna, Kardıologııa jáne ishki aýrýlar ǵylymı-zertteý ınstıtýtyna, dárigerleri Alekseı Evgenevıchke, endokrınologter Laýra Bahytjanqyzy men Balnur Perdeqojaqyzyna joǵary kásibıligi úshin rızamyn, – deıdi alǵysyn aıtqan pasıent.
Qalqansha beziniń qatersiz túıindi isigin az ınvazıvti emdeýdiń ınnovasııalyq, joǵary tıimdi ádisteri qazir Almaty qalasyndaǵy pasıentterge MÁMS aıasynda qoljetimdi. Ǵylymı-zertteý ınstıtýtynyń dárigerleri osymen toqtamaı, keleshekte qalqansha beziniń qatersiz isikteriniń radıojıilikti ablıasııasyn meńgergen mamandardy daıarlaýmen qatar, salany odan ári jetildirýge nıetti.
