Býkıngem saraıy taratqan málimette Charlz patshanyń qaterli isiktiń qaı túrine shaldyqqany aıtylmaǵan. Ol ótken dúısenbiden em qabyldaýdy bastady. Osy kezeńdegi koroldiń keı mindetti keıinge shegerile turmaq. Ázirge dárigerler tyıym salmaıynsha premer-mınıstr Rıshı Sýnakpen apta saıynǵy kezdesýi sekildi qyzmeti jalǵasa beredi.
Osy jańalyqtan keıin úkimet basshysy Rıshı Sýnak korolge tezirek jáne túbegeıli saýyǵyp ketýin tiledi. Sondaı-aq leıborısttik partııa basshysy ser Keır Starmer men ókilder palatasynyń spıkeri ser Lındsı Hoıl patshaǵa saýlyq tiledi.
AQSh prezıdenti Djo Baıden alańdaýshylyq bildirip, korolmen sóılesetinin aıtty. Týıtterdegi paraqshasynda keıinirek «Qaterli isik dıagnostıkasy, emdeý jáne aman qalý úmit pen túbegeıli batyldyqty qajet etedi. Djıl ekeýmiz Birikken koroldik halqyna Uly mártebeliniń jedel saýyǵyp ketýin surap duǵa etemiz», dep jazdy Aq úı basshysy.
Brıtan koroldiginiń jazylmaǵan zańy boıynsha monarh óz mindetin atqara almaǵan jaǵdaıda regenttik tártibi júzege asyrylady. Iаǵnı memlekettiń keńesshisi retinde patsha tuqymynyń bireýi belgilenedi. Degenmen bul kúrdeli hám ońaı másele emes.
1937 jyly qabyldanǵan Regenttik aktinde tórt yqtımal jaǵdaı qarastyrylǵan. Monarh kámelettik jasqa, ıaǵnı 18-ge tolmaǵanda ne densaýlyǵy tolyqtaı syr bergende, ýaqytsha áreketke qabiletsiz bolǵanda, shetelge ketkende belgili bir merzimge basqarýshy belgilenedi.
Alǵashqy eki jaǵdaıda regenttik bılik iske qosylady. Bul qyzmetke kirisken tulǵa monarhtyń búkil qyzmetin atqarady. Keıingilerinde patshanyń atynan áreket etetin «memlekettik keńesshiler» taǵaıyndalady.
Qazirgi tańda Charlz patsha ýaqytsha áreketke qabiletsiz sanalady. Iаǵnı densaýlyǵynda kinárat bar. Biraq keıingi jaǵdaıǵa qaraǵanda ol keńesshi taǵaıyndaýǵa asyqpaıtyn sekildi. Alda-jalda mundaı sheshimge bara qalsa, bul qyzmet úlken uly Ýılıam hanzadaǵa, qaryndasy Anna hanshaıymǵa ne inisi Edvard hanzadaǵa buıyrady.
Negizi Charlz patshanyń ózi bir márte keńesshi rólin atqarǵan. 2022 jyly Elızaveta II densaýlyǵyna baılanysty ony osy laýazymǵa taǵaıyndaǵan bolatyn. Biraq shetelge sapary kezinde jıi-jıi keńesshi belgilep otyrǵany málim.
Negizi Ulybrıtanııa monarhtarynyń saıası kúshi shektelgen. Degenmen atqarýǵa tıis konstıtýsııalyq mindetteri bar. Sonyń basym bóligin memlekettik keńesshi oryndaýǵa quqyly. Tek Parlamentti taratýǵa, Lordtar palatasynyń jańa múshelerin taǵaıyndaýǵa zańmen tyıym salynǵan. Alda-jalda el patshasy qalam ustaýǵa, ne anyq sóıleýge shamasy jetpese, regenttik belgilenedi. Alaıda monarhtyń ózi regenttikti málimdeýge quqyly emes. Mundaı quzyret О́kilder palatasynyń spıkeri, monarhtyń jubaıy sekildi bes adamnan turatyn topqa berilgen.
Alda-jalda Charlz patsha bılikti atqarýǵa jaramsyz sanalsa, onyń ornyna regenttik Ýılıam hanzadaǵa beriledi. Osylaısha, monarhtyń ornyna búkil mindetti atqarady. Áıtse de muragerlikti ózgertýge ǵana tyıym salynǵan.
Osy oraıda aıta ketken jón, Charlz patsha qaterli isikke shaldyqqan alǵashqy Brıtanııa monarhy emes. Máselen, 1951 jyly Georg VI jaman indettiń tyrnaǵyna ilindi. Biraq dárigerler oǵan ókpesindegi qaterli isik týraly aıtpaǵan kórinedi. Halyqqa kúrdeli operasııa jasalatyny jóninde ǵana málimet bergen.
Aıtpaqshy, Ulybrıtanııa tájine qatysty taǵy bir mynandaı qyzyq jaǵdaı bar. Alda-jalda Ýılıam hanzada patsha atanyp jatsa, onyń regenti retinde uly Georg hanzada sanalmaıdy. Ázirge ol kámelettik jasqa 2031 jyly tolady. Oǵan deıin qajet kezde Garrı hanzada regent ne memlekettik keńesshi mindetin atqarýǵa tıis.
