«Árbir fınalıstke sertıfıkat tabystalyp, jeńimpazdar kýbok pen kásibı damýlary úshin qarjylaı grantqa ıe boldy. «Study UK Alumni Award» jeńimpazdary men fınalısteri – qoǵamǵa, ındýstrııaǵa, jalpy eldiń damýyna oń úlesin qosý úshin Ulybrıtanııa ýnıversıtetinde alǵan bilimi men tájirıbesin tıimdi paıdalanǵan óz salasynyń kóshbasshylary. Bul bedeldi syıaqy Ulybrıtanııanyń joǵary biliminiń qundylyǵy men túlekterdiń mansaptyq jáne jeke damýlaryna yqpalyn baıqatady, sondaı-aq, brıtandyq túlekter men oqyǵan ýnıversıtetteriniń halyqaralyq bedelin arttyrady. Syıaqyny Brıtan Keńesi toǵyz jyl qatarynan dúnıe júzindegi Ulybrıtanııanyń halyqaralyq túlekterine joǵary jetistikteri úshin tabystap keledi. Al Qazaqstanda bul baıqaý bıyl tórtinshi ret uıymdastyrylyp otyr», dedi Brıtan keńesiniń kommýnıkasııa boıynsha keńesshisi Shynar Shákenova.
Bıyl atalǵan baıqaýǵa 43 úmitker qatysyp, 12 fınalıst tańdap alynǵan, onyń ishinde tórt sanat boıynsha tórt jeńimpaz anyqtaldy. Aıta keteıik, «Culture and Creativity» atalymymen fınalıster arasynda «Egemen Qazaqstan» gazetiniń «Saıasat jáne quqyq» bóliminiń aǵa tilshisi Gúlnar Joljan da bar. Ol 2017 jyly Ulybrıtanııanyń Newcastle ýnıversıtetinde «Bolashaq» baǵdarlamasymen bilim aldy.
Al «Social Action» atalymynyń jeńimpazy Halıda Ájiǵulova «Bolashaq» baǵdarlamasymen 2019 jyly Ulybrıtanııanyń Leicester ýnıversıtetiniń doktorantýrasynda bilim alyp, zań doktory dárejesin ıelengen. Halıda – adam quqyqtary jónindegi zańger, Almaty qalasynyń Bala quqyqtary jónindegi ýákil jáne Shyǵys Eýropa men Ortalyq Azııadaǵy seksýaldyq qanaýshylyq pen zorlyq-zombylyqtyń aldyn alý boıynsha halyqaralyq keńesshi. Halıdanyń qoǵamdyq jumysy balalardy qorlaýǵa tyıym salatyn jáne barlyq qazaqstandyq mektepterde zorlyq-zombylyqqa qarsy ishki saıasatty júrgizýge mindetteıtin zańnamany qabyldaýǵa negiz boldy. Qazir ol Qazaqstandaǵy balalardyń ál-aýqaty men qorǵalýy týraly tıimdi zańdardy qabyldaý úshin zertteý jáne aqparattyq-nasıhattaý jumystaryn júrgizip júr.
«Qazaqstandaǵy «Study UK Alumni Awards» syılyǵynyń jeńimpazdaryn shyn júrekten quttyqtaımyn! Ulybrıtanııa ýnıversıtetterin támamdaǵan qazaqstandyq túlekterimiz brıtan biliminiń ozyqtyǵyn kórsetip, eki el arasyndaǵy baılanysty burynǵydan da nyǵaıtyp jatyr. Eń bastysy, bizdiń túlekterdi Qazaqstandy ınnovasııalar men ózgeristerge jeteleıtin tulǵalar, óz salalarynyń naǵyz sarapshylary jáne oıshyl kóshbasshylary deýge bolady. Men osyndaı tamasha jastardyń Qazaqstannyń bolashaǵyn qurýda Ulybrıtanııanyń bilimi men ozyq tájirıbesin ákelip jatqanyn maqtan tutamyn», dedi Ulybrıtanııanyń Qazaqstandaǵy elshisi Ketı Lıch.
Qazaqstandaǵy Brıtan keńesiniń dırektory Robert Teılordyń aıtýynsha, Brıtan keńesi bilim berýde jumysy bilim berý men daǵdylardy damytýdy keńeıtýge, Ulybrıtanııanyń tájirıbesi men ınnovasııasyn álemmen bólisýge jáne birlesken jobalardy iske asyrý úshin seriktesterdi biriktirýge baǵyttalǵan.
«Bıyl Brıtan Keńesi halyqaralyq qyzmetiniń 90 jyldyǵyn, sondaı-aq, Qazaqstandaǵy uzaqmerzimdi dıplomatııalyq qatynasynyń 30 jyldyǵyn atap ótedi. Baıqaý jeńimpazdary Ulybrıtanııadaǵy bilim berý tájirıbesin úlken jetistikterge jetý úshin tıimdi qoldana bilgen daryndy túlekterdiń ókilderi», dep atap ótti ol.
